Antyŭtopija «Łobstar»: źjaŭleńnie hetaj stužki ŭ staličnym prakacie stała maleńkim podźviham

U staličnym kinateatry «Rakieta» užo tydzień idzie «Łobstar» – stužka hreckaha režysiora Jorhasa Łantymasa, jakaja narabiła šumu na minułym Kanskim kinafiestyvali.

Źjaŭleńnie stužki ŭ staličnym (niachaj i stroha abmiežavanym) prakacie stała padziejaj. Naprykład, u Rasiju hety adzin z samych hučnych filmaŭ minułaha hoda patrapiŭ na paru fiestyvalaŭ i – tolki jaho i bačyli. Advažnych dystrybjutaraŭ tam nie znajšłosia. Pryjemna, što prajekt Cinemascope heta nie spyniła: «Łobstar» idzie ŭ «Rakiecie» i, zdajecca, niadrenna pryžyŭsia ŭ našym klimacie — pakaz adbudziecca da kanca sakavika.

Pra novy film Jorhasa Łantymasa, aŭtara naminavanaha na «Oskar» u 2009 hodzie «Ikła», ŭžo stolki ŭsiaho napisana, što naŭrad ci ŭdasca dadać da hetych mierkavańniaŭ što-niebudź aryhinalnaje.

U niedalokaj budučyni ŭ adpaviednaści z suvorymi zakonami Horada, adzinokich ludziej nakiroŭvajuć u Hatel, dzie jany pavinny na praciahu 45 dzion znajści sabie paru. Kali im heta nie ŭdajecca, ich pieratvarajuć u žyvioł i nakiroŭvajuć u Les.

Dla mianie «Łobstar» staŭ vialikim rasčaravańniem. Ale nie ŭ mastackim płanie – heta rasčaravańnie ŭ sabie i navakolnym śviecie. Aŭtar uziaŭ na ŭzbrajeńnie ŭvieś svoj cynizm i sarkazm, pastupova vybudavaŭ nie vielmi pryjemny tatalitarny mikrakosm, u jakim davoli lohka paznajecca sučasnaje hramadstva.

Tut aficyjna dziejničajuć patryjarchalnyja paradki: adzinota źjaŭlajecca niedapuščalnaj raskošaj, a siemji budujucca pad prymusam hramadstva, na asnovie niaznačnych padabienstvaŭ indyvidaŭ (naprykład, abodva lubiać katacca na łyžach). Nie chočaš žonku ci muža – pieratvoryšsia ŭ lubuju abranuju žyviolinu.

Pobač śpieje apazicyja – adzinočki-partyzany, jakija pad stracham śmierci admaŭlajucca ŭtvarać pary. I navat śpiecyjalna słuchajuć elektronnuju muzyku, kab nie było žadańnia z kim-niebudź patančyć.

Hipiertrafavanaja mietafara hramadskaj marali, dzie treba być jak usie.

Abodva hetyja adnolkava vychałaščanyja śviety akazvajucca žudasnym vyprabavańniem dla zvyčajnych ludziej, nakštałt miełanchaličnaha vusataha architektara (Kolin Fareł) i jaho blizarukaj siabroŭki (Rejčał Vajs). Jany nie prystasavany da žyćcia va ŭmovach, dzie vychadu pamiž mołatam i kavadłam prosta niama.

I ŭ hetym hałoŭnaja pamyłka «Łobstara». Jaho hieroi, niachaj i vyhladajuć miechanistyčnymi, ažno da dyjałohaŭ, ale im chočacca supieražyvać. Łantymos pazbaŭlaje hledača takoj mahčymaści. A značyć, tolki i zastajecca, što pakinuć zału z dumkami – čornymi, jak chmara.

 ***

«Łobstar» («The Lobster»), 2015.

Režysior: Jorhas Łantymas.
Žanr: drama, fantastyka.
Krainy: Irłandyja, Vialikabrytanija, Hrecyja, Francyja, Niderłandy, ZŠA.
U rolach: Kolin Fareł, Rejčał Vajs, Lea Sejdu, Džesika Bardzin, Alivija Kołman, Ešli Džensen i inš.
Praciahłaść: 118 chvilin.

Film demanstrujecca na anhlijskaj movie z ruskimi subcitrami.

• 0
• 0
• 0
• 0
• 0
• 0
• 0
• 0