Aleksijevič pahadziłasia stać hanarovym staršynioj arhkamiteta «Čarnobylskaha šlachu»
Biełaruskaja piśmieńnica, łaŭreat Nobieleŭskaj premii pa litaratury Śviatłana Aleksijevič pahadziłasia stać hanarovym staršynioj arhkamiteta akcyi «Čarnobylski šlach», paviedamiła 13 krasavika na pres-kanfierencyi ŭ Minsku člen arhkamiteta, aktyvistka ruchu salidarnaści «Razam» Alena Tałstaja.
Pavodle jaje słoŭ, zaŭtra ŭ Minsku na prezientacyi knihi «Śviatłana Aleksijevič na Svabodzie» (zbornik intervju i vystupleńniaŭ Aleksijevič na «Radyjo Svaboda», jaki vyjšaŭ u sieryi «Biblijateka Svabody — XXI stahodździe»), piśmieńnica budzie havaryć u tym liku ab značeńni «Čarnobylskaha šlachu».
«My chočam pakazać, što Čarnobyl nie skončyŭsia, što katastrofa praciahvajecca, — padkreśliŭ jašče adzin člen arhkamiteta, aktyvist Biełaruskaj partyi» Zialonyja «Dźmitryj Kučuk. — Zamoŭčvańnie prablem, źviazanych z Čarnobylem, my źviazvajem z budaŭnictvam u Biełarusi AES». Prajekt budaŭnictva AES u Biełarusi jon nazvaŭ «palityčnym». «Naša partyja suprać budaŭnictva luboj AES. My kažam, što jość inšy šlach raźvićcia — adnaŭlalnych krynic enierhii, vietranych ustanovak, jakija sapraŭdy zrobiać Biełaruś niezaležnaj ad pastavak taho ž ŭranu abo hazu», — skazaŭ Kučuk.
«Čarnobylski šlach» — štohadovaja vuličnaja akcyja, prymierkavanaja da daty avaryi na ČAES, jakuju biełaruskaja apazicyja pravodzić u Minsku z 1988 hoda ŭ farmacie šeścia i mitynhu. Vyklučeńniem staŭ 2011 hod, kali staličnyja ŭłady zabaranili šeście.
Sioleta zajaŭka na akcyju była padadzienaja ŭ Minharvykankam 8 krasavika. Akramia Aleny Tałstoj i Dźmitryja Kučuka zajaŭku padpisali pradstaŭniki Partyi BNF Źmicier Kaśpiarovič, ruchu «Za Svabodu» Juraś Mielaškievič, Abjadnanaj hramadzianskaj partyi Dźmitryj Kavałhin, arhkamiteta pa stvareńni partyi «Biełaruskaja chryścijanskaja demakratyja» Dzianis Sadoŭski i Vital Rymašeŭski, Biełaruskaj sacyjał-demakratyčnaj partyi (Hramada ) Alaksiej Sihajeŭ. Jany płanujuć zbor udzielnikaŭ na placoŭcy kala prezidyuma Nacyjanalnaj akademii navuk 26 krasavika z 18.00 da 19.00, a zatym hadzinnuju demanstracyju pa vulicach Surhanava i Arłoŭskaj da carkvy ŭ honar abraza Božaj Maci «Spatoleńnie zahinułych» i mitynh z uskładańniem kvietak. Akcyja pavinna zaviaršycca ŭ 21.00.
Ciapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty54
Kamientary