Łukašenka: Škoda Biełarusi ad Čarnobylskaj katastrofy skłała 235 młrd dalaraŭ
Biełaruś zrabiła pravilna, pajšoŭšy pa šlachu reabilitacyi terytoryj, paciarpiełych ad katastrofy na Čarnobylskaj AES. Pra heta Alaksandr Łukašenka zajaviŭ, adkazvajučy na pytańni žurnalistaŭ 26 krasavika ŭ Jelskim rajonie (Homielskaja vobłaść).
«Likvidavać nastupstvy katastrofy my byli vymušanyja adnačasova z rašeńniem zadač pa adnaŭleńni kiravanaści krainy, vyratavańni zavodaŭ i fabryk, sielskahaspadarčych pradpryjemstvaŭ, sacyjalnaj abaronie ludziej. Šmatlikija ekśpierty z važnym vyhladam znaŭcaŭ paŭtarali, što navajaŭlenaja respublika nie vytrymaje takoha vializnaha ciažaru. Nam pradrakali chaos i vyradžeńnie, — skazaŭ Alaksandr Łukašenka. — Adnak pierad tvaram ahulnanacyjanalnaha biedstva biełaruski narod, jak heta nie raz byvała ŭ historyi, prajaviŭ praŭdzivy hieraizm. Jon nie apuściŭ ruki, znajšoŭ u sabie siły zhurtavacca, i tamu vystajaŭ».
Kiraŭnik dziaržavy adznačyŭ, što škoda, naniesienaja ekanomicy krainy čarnobylskaj katastrofaj, aceńvajecca prykładna ŭ 235 młrd dalaraŭ.
Da siońniašniaha dnia vydatki Biełarusi na pieraadoleńnie nastupstvaŭ avaryi pieravysili 22 młrd dalaraŭ. Pry hetym, padkreśliŭ Łukašenka, u hetuju sumu ŭvajšli nie ŭsie padliki, zatračanyja čałaviečyja resursy, tamu kančatkovaja ličba moža pieravysić 30 młrd dalaraŭ.
Jon taksama ŭkazaŭ, što Biełaruś spraŭlajecca z nastupstvami čarnobylskaj trahiedyi praktyčna ŭłasnymi siłami.
«Dapamoha mižnarodnaj supolnaści była i zastajecca vielmi niaznačnaj — kala 1-2% ad našych unutranych vydatkaŭ, — skazaŭ Alaksandr Łukašenka.
— Viadoma, kryŭdna, što Zachad mnohija hady cisnuŭ nas sankcyjami, finansavaŭ našu apazicyju zamiest taho, kab akazać nam važkuju padtrymku.
Heta było b u duchu tych samych ahulnačałaviečych kaštoŭnaściaŭ i humanizmu, jakija jon tak dbajna adstojvaje. Tym bolš što biełarusy stali zakładnikami katastrofy, jakaja zdaryłasia nie pa ich vinie».
Z-za radyjeaktyŭnaha zabrudžvańnia pryjšłosia aharadzić šyrokija zony, kudy ŭvachod zabaronieny. Kala 140 tys. čałaviek byli pierasieleny ŭ inšyja miescy. Z abarotu vyviedziena 264 tys. ha sielskahaspadarčych uhodździaŭ, paciarpieła zvyš čverci lasnoha fondu Biełarusi.
«Dziakuj Bohu, u nas chapiła mudraści i vytrymki, kab nie paddacca panicy. Inakš ciapier vielizarnaja častka terytoryi krainy ŭjaŭlała žachlivy vyhlad zapuścieńnia i vymirańnia», — skazaŭ na zakančeńnie biełaruski kiraŭnik.
Jon raspavioŭ, što kali staŭ prezidentam Biełarusi, pierad im stajaŭ surjozny vybar, što rabić u adnosinach paciarpiełych terytoryj. «Ludzi byli napałochanyja. Ale ja ŭsim sercam i dušoj razumieŭ, što heta — naša ziamla i jaje treba adradžać, - skazaŭ kiraŭnik dziaržavy. — Vynik siońnia vidavočny. Možna adkryta i prama skazać: my zrabili pravilna, pačaŭšy reabilitacyju hetych ziemlaŭ».
Jon padkreśliŭ, što hałoŭny ŭdar ad avaryi na ČAES pryniała na siabie mienavita Biełaruś. Za minułyja hady ŭ reabilitacyju paciarpiełych terytoryj byli ŭkładzienyja dziasiatki miljardaŭ dalaraŭ, i zatračanyja namahańni byli nie marnyja. Vynik bačny na prykładzie Jelskaha rajona, jaki naviedaŭ Łukašenka.
«Siońnia ŭ Jelskim rajonie amal nie zastałosia ziamiel, jakija treba viartać da žyćcia. Užo niaŭdobicy raspracoŭvajuć, — adznačyŭ kiraŭnik dziaržavy. — Vaźmicie Dobryń [ahraharadok, dzie pabyvaŭ Alaksandr Łukašenka]: 50 čałaviek u dziciačym sadzie, jašče stolki ž hatovyja chutka tudy pryjści. Značyć, jość pierśpiektyva, jość žyćcio».
«Heta značyć, my zrabili niamała i pryniali pravilnaje rašeńnie, — padkreśliŭ Alaksandr Łukašenka. — Za piacihodku, jakaja pačałasia, pry ŭsich prablemach i ciažkaściach, my kančatkova vyrašym usie pytańni, jakija źviazany z poŭdniem našaj krainy, kab hetyja ziemli zabylisia trahiedyju».
Kažučy pra dasiahnieńni ŭ reabilitacyi čarnobylskich terytoryj, Alaksandr Łukašenka adznačyŭ, što hetuju pracu varta było pačać značna raniej, jašče ŭ časy isnavańnia SSSR.
«Ale tady byŭ stračany čas. Prykładna 10-15 hadoŭ patracili ŭ razvahach i sprečkach. Kali b možna było viarnuć čas nazad, treba było b pačynać heta raniej. Ale i tak zroblena niamała, svaimi rukami», — skazaŭ kiraŭnik krainy.
Kamientary