Infarmacyja ab najaŭnaści stroncyju ŭ biełaruskim małace iłžyvaja. Pra heta siońnia žurnalistam zajaviŭ pieršy namieśnik ministra sielskaj haspadarki i charčavańnia Leanid Marynič, pieradaje BiełTA.
Pavodle słoŭ pieršaha namieśnika ministra, napiaredadni i siońnia byli dadzienyja abviaržeńni. U Biełarusi ŭ zonach radyjacyjnaha zabrudžvańnia viadziecca vielmi surjozny kantrol za vytvorčaściu praduktaŭ charčavańnia, asabliva małočnych, skazaŭ Marynič. Apošni raz u małace niebiaśpiečnyja rečyvy vyjaŭlalisia ŭ 2014 hodzie, u miasie — u 2011 hodzie, nahadaŭ pradstaŭnik Minsielhascharča.
Apublikavanaja infarmacyja nie paćviardžajecca, praciahnuŭ Leanid Marynič. Jon źviarnuŭ uvahu, što aŭtary publikacyj spasyłajucca na vyniki analizu na stroncyj-90, zrobleny na praciahu dvuch-troch hadzin, pry tym, što takija daśledavańni pravodziacca na praciahu siami dzion. «Jak na praciahu dvuch-troch hadzin zrabili taki analiz, nichto nam nie patłumačyŭ, tamu my ličym, što heta dezinfarmacyja», — skazaŭ Leanid Marynič.
Pavodle infarmacyi, jakaja pastupiła ŭ Minsielhascharč z Rasii, tam u biełaruskaj pradukcyi nikoli nie vyjaŭlalisia radyjacyjnyja rečyvy.
«Kali kamuści treba naškodzić i źnizić ekspart charčovaj hrupy tavaraŭ Biełarusi, to chaj adkazvajuć za svaje słovy, jakija apublikavali», — padsumavaŭ pieršy namieśnik ministra.
***
Karespandenty ahienctva Associated Press znajšli na ŭskrainie čarnobylskaj zony adčužeńnia ŭ Biełarusi fiermu, jakaja vyrablaje i pradaje zabrudžanaje radyjonuklidami małako. Jany adnieśli małako ź fiermy Chojnickaha rajona ŭ radyjołahičnuju łabaratoryju Minskaha haradskoha centra hihijeny, epidemiałohii i hramadskaha zdaroŭja. Tam ledźvie damahlisia, kab im dali razdrukoŭku prybora paśla pravierki małaka.
Z razdrukoŭki vynikaje, što ŭ małace, jakoje pastupaje ź fiermy na pradpryjemstva «Miłkavita», utrymańnie stroncyju-90 u 10 razoŭ vyšejšaje za normu. Ale Minski haradski centr abvierh hetuju infarmacyju — maŭlaŭ, «acenka ŭtrymańnia stroncyju-90 nie pravodziłasia».
Kamientary