Statkievič pazbaŭleny paśviedčańnia kiroŭcy za niavypłatu štrafaŭ
Eks-palitviazień, kandydat u prezidenty na vybarach 2010 hoda Mikałaj Statkievič pazbaŭleny paśviedčańnia kiroŭcy za niavypłatu štrafaŭ, nakładzienych na jaho ŭ suviazi z udziełam u niesankcyjanavanych akcyjach pratestu.
Rašeńnie suda Leninskaha rajona Minska ab pazbaŭleńni prava kiravańnia miechaničnymi transpartnymi srodkami palityk atrymaŭ 27 krasavika na pošcie.
«Farmalna rašeńnie zakonnaje: mianie mohuć pazbavić paśviedčańnia za niavypłatu štrafaŭ, roŭna jak i zabaranić vyjezd za miažu albo kanfiskavać paśviedčańnie palaŭničaha ci rybałova. Adnak sami štrafy ja liču niezakonnymi. Ja ničoha nie parušaŭ», — zajaviŭ Statkievič.
Pazbaŭleńnie vadzicielskaha paśviedčańnia jon ličyć elemientam nacisku. Raniej u jaho adklučyli mabilny telefon.
«U mianie dziesiać štrafaŭ. Try jany paviesili na vajennuju piensiju, ź jakoj niezakonna vyličajuć 50% zamiest 20%, a za astatnimi štrafami haniajucca», — skazaŭ palityk.
Statkievič nie vyklučaje, što pazbaŭleńnie vadzicielskaha paśviedčańnia maje i inšuju metu: «Ja žyvu ŭ starym pryvatnym siektary, i dadomu davodzicca chadzić cieraz pustku i park. Mahčyma, razhladajecca varyjant majoj niejtralizacyi. Kali chodziš pieššu — a ja heta lublu, adłavić lahčej. Z mašyny dastać bolš składana». Tym nie mienš najmać vadziciela palityk nie źbirajecca, roŭna jak i lišni raz prasić žonku padvieźci.
Pavodle słoŭ Statkieviča, paśla piaci hadoŭ u turmie ŭ jaho niama nijakich źbieražeńniaŭ, i ŭłada pavinna heta razumieć.
«Viadoma, jość ludskaja salidarnaść, možna sabrać srodki, ale ja nie budu źviartacca pa taki mietad. Heta maja pryncypovaja pazicyja», — padkreśliŭ jon.
Kamientary