U Minsku aktyŭna ŭzialisia za apracoŭku zialonych zon ad klaščoŭ, paviedamlaje minsknews.by.
Na siońniašni dzień akarycydnuju apracoŭku praviali ŭ Bataničnym sadzie, u zialonaj zonie ŭzdoŭž Śvisłačy, u parku imia Horkaha. Hrekavaj i na inšych terytoryjach Leninskaha rajona, u rajonie vuł. Ściebianiova ŭ Kastryčnickim rajonie, u lasnych masivach, prylehłych da terytoryi niekalkich tavarystvaŭ ułaśnikaŭ. Pra heta paviedamiła hałoŭny dziaržaŭny sanitarny doktar h. Minska — hałoŭny doktar DU «Minski haradski centr hihijeny i epidemijałohii» (MHCHiE) Natalla Žukava na apieratyŭnaj naradzie ŭ Minskim haradskim vykanaŭčym kamitecie.
Na sajcie MHCHiE raźmieščanaja karta, jakaja pastajanna abnaŭlajecca. Tut pradstaŭlenaja infarmacyja ab najaŭnaści klaščoŭ na terytoryi zialonych zon Minska. Pry hetym Žukava padkreśliła, što napad klaščoŭ na žycharoŭ Minska čaściej za ŭsio adbyvajecca za miežami stalicy.
Miery prafiłaktyki i abarony
U čas znachodžańnia na pryrodzie nieabchodna:
Maksimalna prykryvać cieła, apranać śvietłuju adziežu (na joj lepš vidać klaščoŭ) z doŭhimi rukavami i kapiušonam, štany zapraŭlać u škarpetki.
Ahladać svaju vopratku kožnyja 2-3 hadziny, pieryjadyčna pravodzić pravierku skury.
Pa viartańni ź lesu, parku staranna ahledzieć vopratku, skuru, źviartajučy asablivuju ŭvahu na nastupnyja častki cieła: šyja, padpachi, pachvina, vušy - u hetych miescach skura asabliva piaščotnaja i tonkaja, klaščy čaściej za ŭsio prysmoktvajucca mienavita tam. Taksama nieabchodna ahledzieć žyvioł, bukiety ź lasnych i palavych kvietak i inšyja rečy, pryviezienyja ź lesu.
Pry nieabchodnaści vykarystoŭvać prociklaščovyja repielenty, u adpaviednaści ź instrukcyjaj pa ich užyvańniu.
Jak dziejničać u vypadku prysmoktvańnia klašča
Klašča varta jak maha chutčej vydalić. Čym daŭžej klešč znachodzicca ŭ prysmaktanym stanie, tym bolšaja vierahodnaść zaražeńnia čałavieka. Zrabić heta lepš u miedycynskaj ustanovie. Kali takoj mahčymaści niama, vydalić jaho možna samastojna adnym z nastupnych sposabaŭ:
Pry dapamozie bavaŭnianaj nitki. Jaje zaviazvajuć ŭ vuzieł, jak maha bližej da chabatka klašča. Zakručvajučy kancy nitki pry dapamozie kruhavoha ruchu, zdabyvajuć klašča, pavoli padciahvajučy jaho ŭvierch. Rezkija ruchi niedapuščalnyja.
Pry dapamozie sterylnaj (prakalenaj) ihołki - jak stremku.
Pincetam. Klašča treba zachapić jak maha bližej da chabatka. Zatym jaho akuratna vyciahvajuć, kruciačy vakoł svajoj vosi ŭ zručny bok. Zvyčajna praz 1-3 abaroty klešč zdabyvajecca całkam razam z chabatkom. Kali ž klašča pasprabavać vydrać - vialikaja vierahodnaść jaho razryvu. Nielha naciskać na bruška, pry hetym mahčyma vydušvańnie jaho źmieściva razam z uzbudžalnikami chvarob u ranku.
Paśla vydaleńnia klašča skuru ŭ miescy jaho prysmoktvańnia apracoŭvajuć nastojkaj jodu abo śpirtam.
Pry vydaleńni klašča nielha vykarystoŭvać alej, kremy, jakija zakarkoŭvajuć dychalnyja adtuliny klašča i pravakujuć dadatkovy vykid uzbudžalnikaŭ u kroŭ čałavieka.
Paśla vydaleńnia klašča nieabchodna abaviazkova źviarnucca ŭ palikliniku pa miescy žycharstva da ŭrača-infiekcyjanista (terapieŭta, piedyjatra) dla pryznačeńnia prafiłaktyčnaha lačeńnia i arhanizacyi miedycynskaha nazirańnia.
Pry źjaŭleńni prykmiet zachvorvańnia nieabchodna nieadkładna źviarnucca ŭ palikliniku pa miescy žycharstva i paviedamić lekaru pra prysmoktvańnie klašča na praciahu apošniaha miesiaca.
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza19
Kamientary