Pieršaje pasiadžeńnie rady Biełaruskaha nacyjanalnaha kanhresa adbudziecca 28 maja ŭ Minsku

Pieršaje pasiadžeńnie rady Biełaruskaha nacyjanalnaha kanhresa adbudziecca 28 maja ŭ Minsku. Pra heta paviedamiŭ Mikałaj Statkievič.

Takoje rašeńnie, pavodle słoŭ palityka, siońnia pryniaŭ arhkamitet kanhresa. «Pa sutnaści, heta było apošniaje pasiadžeńnie arhkamiteta, jaho paŭnamoctvy pierachodziać da rady», — skazaŭ jon.

Rada kanhresa farmirujecca ź liku pradstaŭnikoŭ demakratyčnych partyj i arhanizacyj (pa adnym čałavieku) i pradstaŭnikoŭ rehijanalnych kaalicyj demakratyčnych struktur (pa try čałavieki ad kožnaj vobłaści i Minska).

Prajekt rehłamientu dziejnaści rady, jaki budzie razhledžany na jaho pieršym pasiadžeńni, praduhledžvaje roŭnaść usich jaho subjektaŭ. Rašeńni rady kanhresa buduć prymacca dźviuma tracinami hałasoŭ, pasiadžeńni buduć prachodzić raz u miesiac.

«Na pieršym pasiadžeńni rady kanhresa my abmiarkujem jaho najbližejšyja zadačy. Takim čynam, Biełaruski nacyjanalny kanhres pačynaje svaju dziejnaść. U im budzie pradstaŭlena vielmi vialikaja kolkaść partyj i arhanizacyj, u tym liku tych, kiraŭnictva jakich nie padtrymała praviadzieńnie kanhresa», — skazaŭ Statkievič.

Nahadajem, praviadzieńnie kanhresa demsił z metaj kansalidacyi apazicyi inicyjavała ŭ śniežni minułaha hoda hrupa hramadskich dziejačaŭ Biełarusi, a nieŭzabavie viadomyja palityki Mikałaj Statkievič, Uładzimir Niaklajeŭ i Stanisłaŭ Šuškievič abviaścili pra stvareńnie arhkamiteta pa padrychtoŭcy demakratyčnaha forumu. U skład arhkamiteta taksama ŭvajšli Dźmitryj Daškievič, Viačasłaŭ Siŭčyk, Andrej Sańnikaŭ, Hienadź Fiadynič i Michaił Pastuchoŭ.

Ustanoŭčy schod Biełaruskaha nacyjanalnaha kanhresa prajšoŭ u skviery imia Janki Kupały ŭ Minsku 15 maja. Rašeńnie pravieści kanhres na adkrytym pavietry było pryniata paśla taho, jak arhkamitet nie zmoh arandavać nieabchodnaje pamiaškańnie. Pavodle słoŭ arhanizataraŭ, i dziaržaŭnyja, i pryvatnyja arhanizacyi admovili im u arendzie, bajučysia niehatyŭnaj reakcyi z boku ŭładaŭ, a Minharvykankam admoviŭsia sadziejničać pošuku pamiaškańnia.

Udzielnikami kanhresa byli pryniatyja niekalki rezalucyj («Biełaruś: stan dziaržavy i nacyi», «Biełaruski nacyjanalny kanhres: płatforma pieramienaŭ», «Ab pazicyi kanhresa nakont vybarčaj kampanii 2016 hoda», «Ab adzinstvie demakratyčnych sił»). Milicyjaniery skłali pratakoły ŭ dačynieńni da jaho ŭdzielnikaŭ.

• 0
• 0
• 0
• 0
• 0
• 0
• 0
• 0