Jana ličycca najmacniejšaj šachmatystkaj śvietu.
U niadzielu ŭviečary aficyjna zaviaršyŭsia prezidencki termin prezidenta Vienhryi Tamaša Šujoka, jaki pahadziŭsia syści ŭ adstaŭku paśla taho, jak niadaŭna pryjšła da ŭłady partyja «Cisa» źmianiła kanstytucyju krainy. Premjer-ministr Vienhryi Pieter Madźjar paviedamiŭ, što maje namier prapanavać prezidenckuju pasadu Judzit Połhar — hrosmajstarcy, jakaja ličycca najmacniejšaj šachmatystkaj u historyi, piša Bi-bi-si.
Paŭnamoctvy prezidenta pieravažna cyrymanijalnyja, adnak jon maje prava viartać zakonaprajekty ŭ parłamient na paŭtorny razhlad abo nakiroŭvać ich u Kanstytucyjny sud, skład jakoha taksama byŭ sfarmavany ŭ hady kiravańnia Viktara Orbana.
«Našaj krainie patrebnyja adzinstva, mir i prezident, jakim mohuć hanarycca ŭsie vienhry», — napisaŭ kiraŭnik urada ŭ fejsbuku.
Jon dadaŭ, što ŭ paniadziełak sustreniecca z Połhar i spytaje, ci zhodnaja jana stać prezidentam krainy.
«Imia Judyt Połhar nieparyŭna źviazana z talentam i addanaściu svajoj spravie. Jak samaja paśpiachovaja šachmatystka jana na praciahu 26 hadoŭ uznačalvała suśvietny rejtynh i ŭvachodziła ŭ dziasiatku najmacniejšych šachmatystaŭ śvietu», — adznačyŭ Madźjar.
Judchitt Połhar, jakoj 23 lipienia spoŭnicca 50 hadoŭ, ličycca najmacniejšaj šachmatystkaj u historyi. Jana stała pieršaj žančynaj, jakoj udałosia pieraadoleć rejtynhavuju adznaku ŭ 2700 punktaŭ. U jaje siostry-šachmatystki Žuža i Sofija.
Hulać u šachmaty jana pačała ŭ piacihadovym uzroście, a ŭžo ŭ 15 hadoŭ stała hrosmajstram, pabiŭšy rekord Bobi Fišera.
Z samaha pačatku prafiesijnaj karjery Połhar vystupała ŭ mužčynskich turnirach. U 2002 hodzie padčas matča pamiž zbornaj Rasii i zbornaj śvietu jana pieramahła Hary Kasparava, jaki za niekalki hadoŭ da taho śćviardžaŭ, što «šachmaty nie vielmi padychodziać žančynam», bo «žančyny nie takija mocnyja bajcy».
Jašče raniej, u 1998 hodzie, jana taksama pieramahła Anatola Karpava na adnym z turniraŭ.
U 2014 hodzie Połhar zaviaršyła prafiesijnuju karjeru, a paźniej uznačalvała žanočuju zbornuju Vienhryi pa šachmatach.
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary