Łukašenka paabiacaŭ akazać dziaržpadtrymku «Amkadoru» na $35—40 młn

Dziaržava razhledzić mahčymaść padtrymki płanaŭ raźvićcia chołdynhu «Amkador». Pra heta Alaksandr Łukašenka zajaviŭ 27 maja ŭ časie razmovy z pradstaŭnikami pracoŭnaha kalektyvu ZAT «Amkador-Pinsk», paviedamlaje pres-słužba prezidenta.

Jak było paviedamlena Łukašenku, pradpryjemstvy chołdynhu «Amkador» u cełym i ZAT «Amkador-Pinsk» u pryvatnaści pracujuć ustojliva, asvojvajuć vytvorčaść novych pierśpiektyŭnych liniejek techniki, vyrablajuć kankurentazdolnuju pradukcyju i bačać pierśpiektyvy rostu. Razam z tym «jość peŭnyja ciažkaści, abumoŭlenyja źniešnimi faktarami, kursavymi roźnicami, nieabchodnaściu absłuhoŭvać kredyty, uziatyja pad stvareńnie novych mahutnaściaŭ». Usio heta vymyvaje častku abarotnych srodkaŭ, jakija vielmi nieabchodnyja dla vytvorčaści, asabliva z ulikam tendencyi, što namieciłasia pa roście popytu na pradukcyju.

Łukašenka zajaviŭ, što pytańnie ab mahčymaści padtrymki płanaŭ raźvićcia chołdynhu «Amkador» budzie razhledžana. «Kab vyjści z hetaj situacyi, nie tak šmat i treba — paradku 35—40 młn. dołaraŭ ZŠA, kab zakrucić vytvorčaść i vyjści na toj uzrovień ŭ kancy hoda, jaki vy płanujecie. Pasprabujem vam dapamahčy. Dumaju, my znojdziem takuju mahčymaść. Ale, viadoma, patrebna addača. Tolki napierad, čaho b nam ni kaštavała», — skazaŭ kiraŭnik dziaržavy.

Havoračy ab pracy na źniešnich rynkach, jon adznačyŭ, što biełaruskim pradpryjemstvam nie treba tam kankuryravać i dziejničać raźjadnana. Za miažoj nieabchodna stvarać adzinyja placoŭki dla prodažu techniki i pradastaŭleńnia pasłuh.

ZAT «Amkador-Pinsk», jakoje naviedvaŭ Łukašenka, śpiecyjalizujecca na vypusku ekskavataraŭ, pahruzčykaŭ, darožnych katkoŭ i inšaj techniki. «Heta vialikaja vytvorčaść. U ziamli śvidravinu praśvidravać i niešta zdabyć — taksama patrebien vopyt i ŭmieńnie, ale heta značna praściej, čym stvarać takoje. My heta navučylisia rabić, u tym liku «Amkador», — adznačyŭ kiraŭnik dziaržavy.

Asobna Łukašenka zakranuŭ temu zaniataści, nazvaŭšy najvyšejšaj kaštoŭnaściu zachavańnie kadravaha patencyjału, kampietentnych śpiecyjalistaŭ roznaha ŭzroŭniu. Heta asabliva aktualna ŭ kryzisny pieryjad, kali, dziejničajučy vyklučna na rynačnych pryncypach, moža ŭźniknuć spakusa pajści pa samym prostym šlachu, skaraciŭšy kolkaść rabotnikaŭ. U vyniku moža być stračana kampietencyja ŭ toj ci inšaj śfiery i naniesieny ŭdar pa budučamu raźvićciu pradpryjemstva. «Hetaha dapuścić nielha. Niachaj hety čałaviek krychu mienš atrymlivaje, ale kryzis kaliści zakančvajecca», — padkreśliŭ kiraŭnik dziaržavy.

• 0
• 0
• 0
• 0
• 0
• 0
• 0
• 0