7 červienia Maksim Suško, sudździa suda Maskoŭskaha rajona Minska, vyrašyŭ, što za «schilnym da pravaparušeńniaŭ» Paŭłam Vinahradavym treba ŭvieści previentyŭny nahlad.
Patrabavańnie ab previentyŭnym nahladzie ŭ sud padali nibyta tamu, što Vinahradaŭ tak i nie staŭ na šlach vypraŭleńnia. Paviedamlałasia, što jon padtrymlivaje adnosiny z raniej asudžanymi, nie reahuje na prafiłaktyčnuju rabotu i praciahvaje parušać zakanadaŭstva — majucca na ŭvazie administratyŭnyja spravy za ŭdzieł u schodach i mitynhach.
Sam Pavieł pieradaŭ sudu chadajnictva, u jakim ukazaŭ, što patrabavańni ab nahladzie piarečać patrabavańniam biełaruskaha zakanadaŭstva. Jon patłumačyŭ heta tym, što nahlad moža być uviedzieny na termin nie mienšy za 6 miesiacaŭ. Kali ź jaho zdymuć sudzimaść — a heta adbudziecca praz try miesiacy, — nahlad nie moža praciahvacca. Adnak nahlad na try miesiacy zakanadaŭstvam nie praduhledžany — možna tolki ad šaści.
Praŭda, pradstaŭnik kryminalna-vykanaŭčaj inśpiekcyi raspavioŭ, što, pa jaho płanach, nahlad skončycca, akurat kali zdymuć sudzimaść. Vinahradaŭ praciahvaŭ nastojvać, što takoje «volnaje ŭžyvańnie» nahladu usio roŭna parušaje zakanadaŭstva.
Sudździa niekalki razoŭ pacikaviŭsia: «Dyk što vy ličycie, što kali da źniaćcia sudzimaści zastałosia mienš za 6 miesiacaŭ, to previentyŭny nahlad uvohule nielha uvodzić?» Vinahradaŭ paćvierdziŭ, što mienavita tak jon i ličyć.
«Nu, kali nahlad ustanoviać, to, moža, budu vykonvać patrabavańni, a moža, i nie, — paśmichajučysia paviedamiŭ «Našaj Nivie» Pavieł, pakul sud vyrašaŭ jaho los. — Da źniaćcia sudzimaści zastałosia tolki try miesiacy, heta nie tak šmat. Da hetaha ž było 3,5 hoda nahladu. Dyj tam dapuskajucca try parušeńni — nu, moža, dva ja sabie i dazvolu».
Vadzim Mušynski, advakat, pradstaŭnik Vinahradava, paviedamiŭ, što padstavaj dla spynieńnia nahladu moža być źniaćcie sudzimaści.
«Ale kali vynosiać rašeńnie ab 6-miesiačnym nahladzie ŭ toj čas, kali ŭ čałavieka 3 miesiacy da źniaćcia sudzimaści, ja liču, heta niapravilna», — skazaŭ jon.
Praŭda, sudździa Maksim Suško paličyŭ, što ŭsio narmalna. Nahlad ustanavili. Skončycca jon u vieraśni, kali z Paŭła zdymuć sudzimaść.
Pakolki nahlad — heta prafiłaktyčnaja miera, to 10-ci dzion na abskardžvańnie ŭ Vinahradava niama. Adrazu ŭ sudzie jamu prapanavali padpisać kopiju pastanovy suda pra toje, što previentyŭny nahlad ustupaje ŭ siłu.
Ciapier čytajuć
Aryštavany dyrektar Pałaca Respubliki, adzin z arhanizataraŭ Marafona adzinstva6
Kamientary