Łukašenka ŭ Homieli: dvorniki z racyjami, pradaŭcy kvasu ŭ vyšyvankach
Ranica piatnicy, 17 červienia, u Homieli była napružanaj: tut čakali Łukašenku, pra pryjezd jakoha šmat kazali apošnim časam.
Amal dva tydni tamu horad pačali aktyŭna dobraŭparadkoŭvać: u centry pierakłali asfalt, pafarbavali fasady damoŭ i navat niekatoryja šyfiernyja dachi. Napiaredadni hamialčanie zaŭvažali, jak uzdoŭž budučaha maršrutu kiraŭnika krainy pa Homieli ŭ niekatorych miescach myjuć plitku, a padvały i paddaški damoŭ u centry horada apiačatali.
Da apošniaha momantu pra pryjezd u abłasny centr kiraŭnika dziaržavy nie było nijakaj aficyjnaj infarmacyi, ale pra heta kazali i babuli na łavačkach la padjezdaŭ, i navat biazdomnyja.
U płanach vizitu Łukašenki było adkryćcio ruchu elektraciahnikoŭ pa maršrucie Homiel — Minsk. Praŭda, elektryčki chodziać pa hetym kirunku ŭžo z 3 červienia, tamu da pryjezdu Łukašenki z Homiela vyrašyli zapuścić pieršy hruzavy ciahnik na elektraciazie.
U noč na piatnicu stajanki na Pryvakzalnaj płoščy ačyścili ad mašyn, pracavała šmat evakuataraŭ. Ranicaj u centry horada ruch całkam nie pierakryvali, ale transpartu na darohach było značna mienš. Ruch spyniali tolki padčas prajezdu karteža.
U formie na vulicach dziažuryli tolki daišniki, a ŭsie siłaviki byli ŭ cyvilnym. Na chodnikach vulicy Savieckaj praz kožnyja sto-dźvieście mietraŭ stajali hrupy mužčyn u majkach, kašulach, biejsbołkach, niekatoryja z zaplečnikami, sumkami i navat pakunačkami — jak prostyja ludzi. Ale pad adzieńniem i ŭ kišeniach jany chavali racyi. Kahości navat apranuli va ŭniformu dvornikaŭ, ale znoŭ ža vydavali racyi. U budzionnym cyvilnym adzieńni chadzili navat pradstaŭniki kiraŭnictva UUS.
Da 11 hadzin vakzał u Homieli zakryli i pačali spyniać piešachodaŭ. Hramadski transpart prajazdžaŭ vakzał biez prypynku, na bližejšaj da budynka parkoŭcy vystrailisia čornyja mašyny ź minskimi numarami. Ludzi ŭ cyvilnym całkam ačyścili prachod ad vakzała da mašyn, a pasažyraŭ i minakoŭ spynili la padziemnaha pierachodu da šlachoŭ. Na druhim baku darohu pieraharadzili la pryvakzalnaha kafe.
«A jak na ciahnik patrapić? My spaźniajemsia!» — aburalisia niekatoryja. «Nijakija ciahniki ciapier usio roŭna nie chodziać, paśpiejecie», — adkazvali ludzi ŭ cyvilnym. Darečy, jany pavodzili siabie vielmi karektna i navat časam uśmichalisia.
Usie čakali, što prezidencki kartež padjedzie da parkoŭki, ale raptam Łukašenka ŭ supravadžeńni vyjšaŭ z-za vakzału. «A, jon na elektryčcy pryjechaŭ!» — padumali ludzi.
Łukašenka pahladzieŭ u bok ludziej, jakija sabralisia za ačapleńniem (ich było kala dvuchsot), i padyšoŭ da ich. Ludzi zaapładyravali i dastali mabilniki, kab sfatahrafavać Łukašenku. Na paru chvilin jon spyniŭsia kala natoŭpu i ŭ mikrafon pryvitaŭ usich:
— Dzie b ja ni byŭ, što b ni rabiŭ, ja zaŭsiody kažu — samaje lepšaje, što ŭ nas jość, heta ludzi.
Narod znoŭ zaplaskaŭ, a Łukašenka na raźvitańnie pamachaŭ rukoj i sieŭ u mašynu.
Alaksandr Łukašenka naviedaŭ taksama budaŭničuju placoŭku, na jakoj uzvodziać novy korpus dziciačaj balnicy, i kandytarskuju fabryku «Spartak». Jašče z krasavika kiraŭnika krainy čakaŭ hihant «Homsielmaš», jaki znachodzicca ŭ surjoznym kryzisie. Terytoryju zavoda taksama aktyŭna dobraŭparadkoŭvali, ale ŭ płanie vizitu nie akazałasia naviedvańnia prablemnaha pradpryjemstva.
Paśla druhoj hadziny dnia z vulic źnikli siłaviki ŭ cyvilnym i pasty daišnikaŭ. Zatoje ŭ centry horada časova zastalisia vuličnyja pradaŭcy kvasu i maroziva, adzietyja ŭ kašuli ź biełaruskim arnamientam i sałamianyja hałaŭnyja ŭbory.
Darečy, pakul Łukašenka byŭ na vakzale, miascovaha aktyvista AHP Uładzimira Niapomniaščych, jaki, jak zvyčajna, chadziŭ u majcy «Za Biełaruś biez Łukašenki», zatrymali ŭ centry horada.
«Kala 11 hadzin ja zajšoŭ na poštu na praśpiekcie Pieramohi, pakłaŭ hrošy na internet, i kali vyjšaŭ z adździaleńnia suviazi, nieviadomyja hramadzianskija litaralna skrucili mianie ŭ baranovy roh i siłaj pasadzili ŭ aŭtamabil, dzie trymali za ruki i nohi. Numar mašyny — 5566 JEM-3. Tyja ŭ cyvilnym nie nazvalisia, nie patłumačyli pryčynu zatrymańnia, dastavili mianie ŭ Čyhunačny RAUS, dzie pieradali miascovym supracoŭnikam milicyi, ale ja pračytaŭ lekcyju, što časy źmieniacca, jany buduć adkazvać za hetaje biezzakońnie», — raspavioŭ Niapomniaščych.
Pa słovach aktyvista, u RAUSie skłali pratakoł administracyjnaha zatrymańnia, dzie pryčynaj było paznačana vyśviatleńnie asoby. Ale ŭ pratakole nie było paznačana, kim byŭ zatrymany aktyvist i na jakich padstavach.
Ciapier čytajuć
Łukašenka pra «vialikuju ździełku» z ZŠA: Heta nie tolki palitviaźni6
Kamientary