Ułady ZŠA rassakrecili apošnija 28 staronak dakładu pra terakty 11 vieraśnia. Zhodna z dakumientam, šerah hramadzian Saudaŭskaj Aravii, źviazanych z uradam hetaj krainy, dapamahali hrašyma niekatorym udzielnikam teraktu.
Kamitet pa vyviedcy Pałaty pradstaŭnikoŭ Kanhresa ZŠA apublikavaŭ u piatnicu, 15 lipienia, zakrytuju častku aficyjnaha dakłada pra terakty 11 vieraśnia 2001 hoda, jakaja składajecca z 28 staronak i zastavałasia zasakrečanaj ad 2002 hoda, paviedamlaje Reuters.
Jak udakładniaje Bloomberg, z apublikavanaha dakumienta vynikaje, što šerah hramadzian Saudaŭskaj Aravii, źviazanych z uradam hetaj krainy, dapamahali hrašyma niekatorym udzielnikam teraktu.
Aficyjny pradstaŭnik Biełaha doma Džoš Ernest na bryfinhu ŭ piatnicu zajaviŭ, što 28 staronak dakładu nie ŭtrymlivajuć dokazaŭ taho, što ŭłady Saudaŭskaj Aravii adyhryvali jakuju-niebudź rolu ŭ tych teraktach.
Jašče pierad apublikavańniem staronak dakładu siabra Kamiteta pa vyviedcy Adam Šyf kazaŭ NBC News, što tyja, chto raźličvajuć, što hetyja staronki ŭtrymlivajuć siensacyjnyja vysnovy, buduć rasčaravanyja.
Amal uvieś 838-staronkavy dakład pra terakty 11 vieraśnia byŭ apublikavany ŭ 2002 hodzie, adnak 28 staronak ź jaho byli zasakrečanyja tahačasnym prezidentam ZŠA Džordžam Bušam-małodšym, jaki zajaviŭ, što raskryćcio hetaj infarmacyi moža pieraškodzić rasśledavańniu teraktaŭ.
Ciapier čytajuć
Andrej Švied, architektar represij, pryznačany staršynioj Viarchoŭnaha suda13
Kamientary