Aleś Łahviniec daŭ džazu na tok-šou Hihina. Jarmošyna: Heta djabał!
Namieśnik staršyni Ruchu «Za Svabodu» Aleś Łahviniec žorstka raskrytykavaŭ ułady na telekanale ANT.
Tok-šou «Sprava pryncypu» ź viadučym Vadzimam Hihinym 22 žniŭnia było pryśviečanaja temie parłamienckich vybaraŭ. Adnym z haściej pieradačy byŭ Aleś Łahviniec, jakoha nie zarehistravali kandydatam u deputaty pa Sucharaŭskaj vybarčaj akruzie. Łahviniec syšoŭsia ŭ haračaj dyskusii sa staršyńkaj CVK Lidzijaj Jarmošynaj.
Łahviniec pierš za ŭsio padkałoŭ Vadzima Hihina jak patencyjnaha vybarca, bo viadučy žyvie ŭ Sucharavie i hipatetyčna moh hałasavać za pradstaŭnika Ruchu «Za Svabodu».
«Ja vykarystoŭvaŭ vybarčuju kampaniju, kab prademanstravać, što ŭłada ŭ nas niespraviadlivaja. Sapraŭdnyja vybary buduć tolki tady, kali budzie prazrysty praces. Usie naziralniki ABSIE kažuć, što ŭ nas niespraviadlivyja vybary, niama padliku hałasoŭ», — skazaŭ Łahviniec.
Jon ahučyŭ infarmacyju, što z 37 čałaviek, jakija jahonaja kamanda vyłučyła va ŭčastkovyja kamisii, zarehistravanyja byli tolki dvoje.
«Dyk a navošta vy hety teatr absurdu rabili?» — spytaŭsia Hihin.
«Kab pakazać, što vybaraŭ niama. Pakul u nas nie rasśledavanyja da kanca spravy źnikłych palitykaŭ, pakul u krainie jość palitviaźni, spraviadlivych vybaraŭ nie budzie», — zapeŭniŭ Aleś Łahviniec.
«My karystajemsia vybarami, kab prademanstravać niespraviadlivaść uładaŭ. Niespraviadlivaść u pytańni zarobkaŭ». Na hetym Hihin sprabavaŭ pierabić Łahvinca: «Niespraviadlivaja ŭłada daje apazicyi mahčymaść jaje krytykavać».
«Narod daje. Heta zapisana ŭ Kanstytucyi».
Paśla Vadzim Hihin sprabavaŭ «abaranić» Alesia Łahvinca pierad Lidzijaj Jarmošynaj, čamu ž apazicyjnaha kandydata nie zarehistravali kandydatam u deputaty.
«Vy vystupajecie advakatam djabła, — adrezała Jarmošyna. — Łahviniec pavodziŭ siabie tak, nibyta dla padručnika «Jak nielha pavodzić siabie padčas vybaraŭ. Pastajanna, dziorzka, hruba parušaŭ vybarčaje zakanadaŭstva. Pryčym rabiŭ jon heta namierana, śpiecyjalna».
Łahviniec adznačyŭ, što siońnia parłamient usprymajecca jak siniekura, mahčymaść dla namienkłatury zarabić dobruju piensiju. «U vas dobraja piensija budzie, spadarynia Lavonienka?» — spytaŭsia jon rytaryčna ŭ deputatki-kamunistki Valanciny Lavonienka.
Pry kancy Łahviniec adznačyŭ, što falsifikacyi adbyvajucca na ŭzroŭni ŭčastkovych kamisij.
U fejsbuku Aleś Łahviniec napisaŭ, što ź jahonaha vystupu była vydalenaja nastupnaja častka: «Spraviadlivyja vybary buduć tady, kali Łukašenka i Jarmošyna buduć na piensii».
Taksama hościem pieradačy byŭ palityčny analityk Valeryj Karbalevič. Jon adznačyŭ, što vybaraŭ u krainie niama.
«Navat ułada nie chavaje taho, što heta imitacyja. Jarmošyna niadaŭna skazała, što apazicyja rychtujecca da parazy. Vybary jašče nie pačalisia, a ŭžo viedajuć ich vyniki. Prosta niejkaja Vanha. Ujavicie, kali futbolny sudździa, vyvodziačy kamandy na pole, budzie kazać adnoj ź ich: «U vas niama šancaŭ, vy sastupicie».
«Vynik zahadzia viadomy», — ličyć analityk.
Kali Kanapackaja stała całkam padkantrolnaja Łukašenku?13
Kamientary