Z Bresta da Mazyra za 7 dzion. Jak vyhladaje pieršy biełaruski kruizny łajnier VIDEA

Z 2011 hoda ŭ Pinsku viadziecca budaŭnictva pieršaha biełaruskaha račnoha kruiznaha łajniera «Biełaja Ruś». Da hetaha momantu stupień jaho hatoŭnaści składaje 96%. Jak śćviardžajuć u RUEBP «Dniaproŭska-Buhski vodny šlach», pasažyry zmohuć adpravicca ŭ siamidzionnaje vodnaje padarožža z Bresta ŭ Mazyr užo ŭ krasaviku 2017 hoda.

Kruizny łajnier «Biełaja Ruś» stvaraŭsia pinskimi račnikami z techničnaha sudna AS-2 na asnovie prajekta homielskaha AAT «Biełsudnaprajekt». Da hetaha momantu jaho budaŭnictva znachodzicca ŭ zaviaršalnaj stadyi, viaducca raboty pa ŭnutranym azdableńni kajut ciepłachoda. Na borcie sudna mohuć adnačasova raźmiaścicca bolš za 30 čałaviek, a ŭ prahułačnym varyjancie — bolš za 50.

Jak raspavioŭ Siarhiej Zubko, namieśnik hienieralnaha dyrektara pa ekanomicy RUEBP «Dniaproŭska-Buhski vodny šlach», na dvuch pałubach kruiznaha łajniera dla pasažyraŭ padrychtavanyja 16 kajut roznaha kłasa — ad ekanom da luks. U biudžetnych kajutach jość spalnaje miesca, televizar, chaładzilnik, siejf, dušavyja i sanvuzły ahulnaha karystańnia. U kajutach «standart» jość dadatkovaje spalnaje miesca, kandycyjanier, asobny sanvuzieł.

Na łajniery jość i dźvie dvuchpakajovyja kajuty najvyšejšaha kłasa z usimi vyhodami. Hetyja apartamienty nazvanyja ŭ honar kłasikaŭ biełaruskaj litaratury Jakuba Kołasa i Janki Kupały, u ich buduć znachodzicca i tvory piśmieńnikaŭ. Na dumku stvaralnikaŭ łajniera, heta moža spryjać pavyšeńniu cikavaści turystaŭ da biełaruskaj kultury.

Ciapier užo na pradpryjemstvie šukajuć i piersanał dla kruiznaha łajniera. Miarkujecca, što sudovaja kamanda budzie składacca ź dzieviaci čałaviek. Ź ich čaćviora niepasredna dla kiravańnia sudnam, a piaciora — absłuhoŭvajučy piersanał. I kali pytańnie z kirujučaj kamandaj vyrašana, to miescy barmenaŭ, kuchonnych rabočych, aficyjantaŭ pakul jašče vakantnyja. I pry ich pošuku na RUEBP «Dniaproŭska-Buhski vodny šlach» buduć razhladać kandydatury nie tolki ź Pinska abo Bresckaj vobłaści.

Vodny maršrut, jaki atrymaŭ nazvu «Žamčužyny Paleśsia», pralahaje z Bresta ŭ Mazyr i nazad. Pachvilinnaja prahrama 7-dzionnaha padarožža ŭžo raspracavanaja. Udzieł u arhanizacyi račnoha vajažu uziała i viadomaja rasijskaja turfirma ź vialikim dośviedam padobnych turaŭ «Nika».

Na praciahu ŭsiaho kruizu turysty buduć atrymlivać asałodu ad niezabyŭnych krajavidaŭ biełaruskaha Paleśsia, paznajomiacca z samabytnymi miascovymi tradycyjami, naviedajuć vytvorčaść i kulturnyja abjekty — ubačać usio samaje lepšaje, čym bahataje Paleśsie.

Śpiecyjalisty spadziajucca, što kruizny varyjant adpačynku zmoža zacikavić vialikuju kolkaść turystaŭ, u tym liku i zamiežnych. Vodny tur «Žamčužyny Paleśsia» taksama budzie prezientavany na vystavie ŭ Bierlinie ŭ 2017 hodzie, tamu asnoŭny prytok zamiežnych turystaŭ čakajuć ŭžo z 2018 hoda. A pieršych pasažyraŭ ź Biełarusi i Rasii kruizny łajnier prymie ŭžo ŭ krasaviku 2017 hoda.

• 0
• 0
• 0
• 0
• 0
• 0