Kala traciny biełaruskich dziaciej (ad 20 da 30%) pakutujuć na atłuścieńnie abo zališniuju masu cieła, paviedamiła zahadčyca kafiedry piedyjatryi Biełaruskaj miedycynskaj akademii paśladypłomnaj adukacyi prafiesar Ludmiła Bialajeva 30 vieraśnia na respublikanskaj navukova-praktyčnaj kanfierencyi «Dasiahnieńni i prablemy ŭ prafiłaktycy i lačeńni zachvorvańniaŭ dziciačaha ŭzrostu».
Padobnaja situacyja, pavodle jaje słoŭ, adznačajecca ŭ Rasii, krainach Jeŭropy i inšych rehijonach. «Katastrafičny rost kolkaści vypadkaŭ atłuścieńnia adznačajecca praktyčna va ŭsim śviecie», — zajaviła śpiecyjalist, adznačyŭšy, što siońnia atłuścieńnie razhladajecca lekarami jak «epidemija XXI stahodździa».
Prafiesar adznačyła, što za apošnija 10 hadoŭ častata atłuścieńnia ŭzrasła ŭ siarednim na 25—40%. Taki burny rost, ličyć jana, abumoŭleny ŭpłyvam «zachodniaha ładu žyćcia».
«U pieršuju čarhu, vielmi źmianiłasia industryja charčavańnia. Źmianilisia zvykły racyjon charčavańnia, ład žyćcia i myśleńnia, — skazała Bialajeva. — Siadzieńnie za kampjutaram siońnia biada nie tolki padletkaŭ i moładzi, ale i ludziej stałaha ŭzrostu. Usio heta ŭpłyvaje vielmi surjozna na myśleńnie, na pavodzinavyja reakcyi».
Jana padkreśliła, što va ŭsich rehijonach śvietu SAAZ prahnazuje dalejšy rost kolkaści poŭnych ludziej. Pavodle danych arhanizacyi, da 2025 hoda na atłuścieńnie buduć pakutavać 40% mužčyn i 50% žančyn.
«I što samaje strašnaje, da 80% dziaciej z atłuścieńniem ad 10 da 16 hadoŭ buduć pakutavać na jaho ŭ darosłym žyćci. Asabliva heta tyčycca tych dziaciej, čyje baćki majuć takuju ž prablemu», — patłumačyła śpiecyjalist.
Jana padkreśliła, što atłuścieńnie ciahnie ryzyku raźvićcia sardečna-sasudzistych zachvorvańniaŭ, takich jak arteryjalnaja hipiertenzija, išemija, rannija formy aterasklerozu.
Jašče adno ŭskładnieńnie atłuścieńnia — cukrovy dyjabiet. Pavodle źviestak Mižnarodnaj dyjabietyčnaj asacyjacyi, štohod va ŭsim śviecie bolš za 200 dziaciej zachvorvajuć na cukrovy dyjabiet II typu. U šmat jakich dziaciej z atłuścieńniem dyjahnastujecca mietabaličny sindrom — kompleks mietabaličnych, harmanalnych i kliničnych parušeńniaŭ, jakija źjaŭlajucca faktarami ryzyki raźvićcia sardečna-sasudzistych zachvorvańniaŭ.
Na dumku Bialajevaj, prafiłaktyčnyja mierapryjemstvy na papulacyjnym, siamiejnym uzroŭniach i ŭ hrupach ryzyki i metanakiravanaja terapija na etapie dziacinstva — adzinaja mahčymaść źnizić ryzyku sardečna-sasudzistych zachvorvańniaŭ i dyjabietu II typu ŭ darosłym žyćci.
«I kali ŭ dziciačym i padletkavym uzroście hetym nie zajmacca, u darosłym žyćci, na vialiki žal, heta zrabić praktyčna niemahčyma. Atrymać vynik udajecca adzinkam», — reziumavała jana.
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza19
Kamientary