«Biełaruśkalij» i jaho trejdar Biełaruskaja kalijnaja kampanija (BKK) vydatkavali za hod na prasoŭvańnie svaich intaresaŭ na amierykanskim rynku bolš za 0,5 młn dalaraŭ. Heta vynikaje sa spravazdačnaści, jakaja publikujecca ŭ adpaviednaści z zakonam ab rehistracyi zamiežnych ahientaŭ (FARA), jaki byŭ pryniaty ŭ 1938 hodzie.
Hety dakumient abaviazvaje raskryvać infarmacyju ab svajoj dziejnaści ŭsie arhanizacyi, jakija pradstaŭlajuć intaresy zamiežnych kampanij u palityčnaj i kvazipalityčnych śfierach ZŠA. Arhanizacyi pavinny davoli padrabiazna raśpisvać kroki pa łabiravańni intaresaŭ svaich zamiežnych klijentaŭ.
Jak paviedamlaje vydańnie Politico, u apošnija čas Biełaruś, Azierbajdžan i Tadžykistan značna pavialičyli vydatki na prasoŭvańnie svaich intaresaŭ u ZŠA. U jakaści prykładu pryvodzicca historyja z «Biełaruśkalijem» i BKK.
Ź leta minułaha hoda intaresy biełaruskich kalijščykaŭ na amierykanskim rynku stała pradstaŭlać adna z najbujniejšych u ZŠA jurydyčnych kampanij Greenberg Traurig. Jana ažyćciaŭlaje na karyść biełaruskich kampanij kansultavańnie pry źmienach, jakija rychtujucca ŭ amierykanskim zakanadaŭstvie, a taksama infarmavańnie ŭrada i lidaraŭ mierkavańniaŭ datyčna hetych pradpryjemstvaŭ i kalijnych uhnajeńniaŭ. U spravazdačnaści davoli padrabiazna raśpisanyja sustrečy pradstaŭnikoŭ jurydyčnaj kampanii z kanhresmienami, skiravańnie čynoŭnikam zapytaŭ i zvarotaŭ. Ich matyŭ paznačany jak «sumlenny handal i kankurencyja na rynku kalijnych uhnajeńniaŭ u ZŠA».
Pavodle dadzienych FARA, za 6 miesiacaŭ ź listapada 2015 hoda pa krasavik 2016 ha «Biełaruskaja kalijnaja kampanija» zapłaciła bolš 298 tysiač dalaraŭ. A «Biełaruśkalij» — bolš jak 139 tysiač dalaraŭ.
U žniŭni 2015 hoda BKK zaklučyła ź pijar-ahienctvam Sanitas International hadavy kantrakt. U adpaviednaści ź im Sanitas abaviazałasia akazvać kansultacyjnyja pasłuhi pa ŭzajemadziejańni sa ŚMI i praviadzieńni tłumačalna-infarmacyjnaj kampanii dla abarony intaresaŭ BKK, farmavańnia stanoŭčaha imidžu kampanii i biełaruskaha kaliju ŭ ZŠA. Pry nieabchodnaści Sanitas pavinna dziejničać pry pastajannaj kaardynacyi z Greenberg Traurig, skazana ŭ dakumiencie. Košt pasłuh Sanitas — 25 tysiač dalaraŭ u miesiac.
Nahadajem, što viasnoj-letam minułaha hoda hrupa amierykanskich palitykaŭ na čale z kanhresmienam-respublikancam Styvam Pirsam aktyŭna damahałasia ŭviadzieńnia sankcyj u dačynieńni da «Biełaruśkalija» i BKK. U Kanhres ZŠA navat byŭ uniesieny adpaviedny zakonaprajekt.
U dziejańniach amierykanskich zakanadaŭcaŭ BKK uhledzieŭ «łabiravańnie intaresaŭ inšych vytvorcaŭ». U pryvatnaści, «vytvorca kaliju ź Ńju-Mieksika, Intrepid Potash, tolki ŭ pieršym kvartale ažyćciaviŭ płaciož u pamiery 440 tysiač dalaraŭ za pasłuhi kampanii Hogan Lovells US LLP pa łabiravańni svaich intaresaŭ u Kanhresie ZŠA». U BKK zajavili, što «nie mierkavali, što kankurenty buduć vykarystoŭvać palityčnaje zapałochvańnie dla vyrašeńnia zvyčajnych rynkavych zadač».
Jak by tam ni było, pavodle dadzienych Politico, nieŭzabavie paśla inicyjatyvy Pirsa biełaruskija kalijščyki stali supracoŭničać z amierykanskimi GR-śpiecyjalistami (ekśpierty pa suviaziach ź dziaržaŭnymi orhanami). U vyniku inicyjatyva z zakonaprajektam nie dajšła da stadyi surjoznaha abmierkavańnia, kanstatuje vydańnie.
U pres-słužbie BKK paćvierdzili dakładnaść infarmacyi ab supracoŭnictvie z amierykanskimi łabisckimi strukturami.
— Prychodziačy na toj ci inšy rynak, BKK pracuje i žyvie pa tych praviłach, jakija pryniatyja ŭ hetaj kankretnaj krainie. Łabiravańnie ŭ ZŠA źjaŭlajecca efiektyŭnym srodkam pazicyjanavańnia dla kamiercyjnych kampanij, i niama nijakich pryčyn admaŭlacca ad tych rabočych instrumientaŭ, jakija vykarystoŭvajuć našy kankurenty, — skazała pradstaŭnik biełaruskaj kampanii Iryna Saŭčanka. — Złučanyja Štaty — heta vialiki rynak. Jaho siaredniaja jomistaść składaje bolš za 8-8,3 młn ton kaliju ŭ hod, ź jakich impartujecca kala 7,5 młn ton. Jak i ŭsiudy, tut prysutničajuć svaje kankurentnyja składanaści, palityčnyja, kulturnyja i ekanamičnyja asablivaści. Dla pośpiechu na hetym rynku nieabchodnyja ciarplivaść, spakoj i zdolnaść da adaptacyi.
Što datyčycca pastavak BKK u ZŠA, to pa vynikach 9 miesiacaŭ 2016 hoda kampanija ekspartavała na hety rynak kala 200 tysiač ton kaliju. Za anałahičny pieryjad 2015 hoda było pastaŭlena kala 145 tysiač ton biełaruskich kalijnych uhnajeńniaŭ. U kampanii nie raskryvajuć hrašovy dachod ad hetych pastavak. Pavodle dadzienych aficyjnaj statystyki, za studzień-lipień Biełaruś ekspartavała ŭ ZŠA kalijnych uhnajeńniaŭ na sumu 16,7 młn dalaraŭ.
Ciapier čytajuć
«Ź mianie ničoha nie voźmieš, a ludzi paciarpieli». Para piensijanieraŭ druhi hod nie moža vypisać ź minskaj kvatery šmatdzietnuju siamju emihrantaŭ99
Kamientary