Jeŭraradyjo vyjšła na dobruju znajomuju Ułada K., jaki atakavaŭ HC «Jeŭropa» ź bienzapiłoj i padazrajecca ŭ zabojstvie. Padazravany telefanavaŭ dziaŭčynie ŭ pačatku kastryčnika i skardziŭsia na toje, što jaho vyklučajuć z univiersiteta.
«U jaho byli prablema z vučobaj, jon raiŭsia, jak ich vypravić. U pačatku navučalnaha hoda prapuściŭ čatyry dni. Praź niejki čas prapuściŭ jašče tydzień, nie schadziŭ da ŭrača, nie mieŭ daviedki pra chvarobu. Ale naprykancy razmovy jon skazaŭ, što adličeńnie jaho mocna nie turbuje, bo ŭ jaho jość svoj płan. Heta hučała dziŭna, ale ŭ im zaŭždy byli niejkija dzivactvy», — zhadvaje dziaŭčyna pra apošniuju telefonnuju hutarku z Uładam.
Jeŭraradyjo: Jak daŭno vy ź im znajomyja? Jon stvaraŭ uražańnie niebiaśpiečnaha čałavieka?
Znajomaja K.: Viedaju jaho dva hady. Čałaviek jon dziŭny. Nie lubić ludziej, nie lubić siabie. Jamu nie padabajecca jahonaja źniešnaść. Časam jon padazrona žartavaŭ. Pra toje, što zabiŭ by kaho-niebudź, što nie lubić ludziej. Ale ahresii ni da kaho nie pakazvaŭ, kanfliktaŭ ź im nie było. Jon byŭ vielmi zamknionym čałaviekam i nie mieŭ siabroŭ. Časta naŭmysna tak žartavaŭ napakaz. Viedaju, što ŭ škołu №27 jon nasiŭ z saboj piarcovyja sprei. Dla čaho, ja nie viedaju. Dla biaśpieki ci naadvarot. Kab jon ich vykarystoŭvaŭ, ja nie čuła. Ale pierad adnakłaśnikami demanstravaŭ napakaz.
Jeŭraradyjo: Miarkujučy pa videa, Uład — vysokaha rostu, i niekatoryja naviedniki HC «Jeŭropa» paličyli, što jon fizična mocny mužčyna, čaho nie padumaješ pra 17-hadovaha chłopca.
Znajomaja K.: Mnie zdajecca, rost u jaho nižejšy za 180 sm. Vysoki, ale nie nadta. Jon chadziŭ u zału, zajmaŭsia sportam. Chudarlavym jaho dakładna nie nazavieš.
Jeŭraradyjo: Na ŭzroŭni čutak źjaviłasia infarmacyja, što padazravany žyŭ sam, bo jaho maci i siastra źjechali ŭ Niamieččynu.
Znajomaja K.: Dzieści hod tamu siastra źjechałasia z chłopcam. Jaho mama lotaje ŭ Hiermaniju, tamu što ŭ ich tam dom. Uład taksama, zdarałasia, lotaŭ u Hiermaniju. Mama ŭ asnoŭnym, nakolki mnie viadoma, žyvie razam ź im. Baćka žyvie asobna ŭ pasiołku. Uład da jaho časam pryjazdžaŭ i dapamahaŭ pa haspadarcy. Čachoł u jaho taksama źjaviŭsia nievypadkova. Jon hraŭ na akustyčnaj hitary.
Jeŭraradyjo: To bok kanfliktaŭ z maci va Ułada nie było?
Znajomaja K.: Mama jaho vielmi lubić, zaŭždy biehaje za im. Jana viernica, a jon ateist. Ale ŭ cełym u ich adnosiny nibyta byli narmalnyja. Maci, zdajecca, nidzie nie pracavała, dzie jany brali hrošy, ja nie viedaju. Uład moh sam siabie zabiaśpiečvać. Ja nie viedaju, praŭda, jak jon zarablaŭ. Ale kazaŭ, što sam apłačvaŭ repietytaraŭ pierad pastupleńniem.
Jeŭraradyjo: Ci byŭ jon amataram kampjutarnych hulniaŭ?
Znajomaja K.: Nie, heta nie jahonaje. I noŭtbuk u jaho źjaviŭsia niadaŭna. Jon nie hulaŭ ni ŭ jakija hulni. I navat u sacyjalnych sietkach amal nikoli nie siadzieŭ. Była ŭ jaho staronka, ale jon jaje daŭno vydaliŭ, tam niama nijakaj infarmacyi.
Kamientary