Hienierał-lejtenant armii ZŠA ŭ adstaŭcy Majkł Flin atrymaŭ prapanovu abranaha prezidenta Donalda Trampa zaniać pasadu daradcy pa pytańniach nacyjanalnaj biaśpieki, paviedamlajuć u Biełym domie.
U 2012-2014 hadach Flin uznačalvaŭ vyviedvalnaje ŭpraŭleńnie ministerstva abarony ZŠA. Jon śćviardžaje, što jaho prymusili syści ŭ adstaŭku z hetaj pasady praź jaho pohlady na radykalny isłam, infarmuje BBC.
Na dadzieny momant krynicy infarmahienctvaŭ ŭ prezidenckaj administracyi nie paviedamlajuć, ci pahadziŭsia Flin zaniać pasadu.
Ad lutaha pa listapad hienierał-lejtenant byŭ adnym z daradcaŭ Trampa, pakul išła jaho vybarčaja kampanija. Dla pryznačeńnia daradcy abranamu prezidentu nie treba zaručacca padtrymkaj Kanhresu.
Letaś Flin naviedaŭ śviatočnuju viačeru ŭ Maskvie z nahody 10-hodździa rasijskaha anhłamoŭnaha dziaržkanała RT, raniej viadomaha jak Russia Today, čym mocna ździviŭ isteblišment.
Jak paviedamlali ŚMI, na mierapryjemstvie eks-kiraŭnik vyviedki Pientahona znachodziŭsia pobač z hałoŭnym redaktaram telekanała Marharytaj Simańjan i niepadalok ad Uładzimira Pucina.
Paźniej, u intervju RT Flin zajaviŭ, što ZŠA i Rasija pavinny pracavać razam, kab vyrašyć prablemu hramadzianskaj vajny ŭ Siryi i spravicca z teraryzmam.
Akramia taho, Flin zajaŭlaŭ, što vajna ŭ Iraku, jakuju pačaŭ u 2003 hodzie prezident Džordž Buš, była pamyłkaj i ŭ vyniku pryviała da aktyŭnaha raźvićcia tam terarystyčnych hrup.
Kamientary