Tramp zabiare hrošy ŭ ekołahaŭ i addaść ich na daśledavańnie kosmasu

Tramp užo nieadnarazova admaŭlaŭ prablemu hłabalnaha paciapleńnia, jakuju jon nazvaŭ «kitajskaj falšyŭkaj, prydumanaj, kab vyvieści vytvorčyja mahutnaści z ZŠA ŭ azijackija krainy». Vidavočna, novy prezident ZŠA budzie nadzialać mienš uvahi źmienam klimatu, čym heta rabiła administracyja Abamy.

Daradca Trampa pa pytańniach daśledavańnia kosmasu Bob Uokier paviedamiŭ The Telegraph, što NASA skancentrujecca ŭ bližejšyja hady na palotach u kosmas, kab u pierśpiektyvie da kanca biahučaha stahodździa skončyć daśledavańnie Soniečnaj sistemy i vyjści za jaje miežy.

Letaś padraździaleńnie NASA, jakoje ažyćciaŭlaje manitorynh za klimatyčnymi źmienami, atrymała ad dziaržavy 1,92 młrd dalaraŭ. Niekatoryja navukoŭcy abaraniajuć dziejnaść departamienta, źviartajučy ŭvahu na toje, što pradkazańni źmienaŭ klimatu ratujuć vialikuju kolkaść čałaviečych žyćciaŭ. Respublikancy, u svaju čarhu, skardziacca na toje, što arhanizacyja, jakaja raniej adpraŭlała ludziej na Miesiac, ciapier zajmajecca «prahnozam nadvorja».

Fota wired.com

Pieršym krokam u asvajeńni kosmasu musić stać novy palot astranaŭtaŭ na Miesiac. Apošni raz naha čałavieka kročyła pa pavierchni spadarožnika Ziamli ŭ 1972 hodzie. Administracyja Džordža Buša-małodšaha sprabavała adnavić paloty na Miesiac da 2020 hoda, ale prahrama «Suzorje» była zakrytaja Barakam Abamam. Niahledziačy na heta, peŭnyja raspracoŭki ŭ hetyja hady ŭsio ž vialisia, što tearetyčna zmoža dazvolić amierykancam adpravić ludziej na Miesiac u bližejšyja 8 hadoŭ.

Praź niekalki miesiacaŭ čakajecca pryznačeńnie prezidentam ZŠA novaha kiraŭnika NASA. Asnoŭnymi favarytami ličacca Džejms Brajdenstajn i Skot Pejs. Abodva jany źjaŭlajucca prarespublikanskimi «jastrabami» i aktyŭna padtrymlivajuć «viartańnie» na Miesiac, tamu paskareńnie kaśmičnaj prahramy ZŠA amal niepaźbiežnaje.

Amierykanski astranaŭt Baz Ołdryn, druhi čałaviek, jaki stupiŭ na pavierchniu Miesiaca (paśla Niła Armstranha), padtrymaŭ płany Donalda Trampa. Ołdryn taksama zaklikaŭ jaho raźvivać amierykanskuju kaśmičnuju prahramu ŭ kaapieracyi ź inšymi krainami.

Palot na Miesiac moža stać peŭnaj padrychtoŭkaj da palotu čałavieka na Mars. Savietnik novaabranaha prezidenta ZŠA Bob Uokier adznačyŭ, što naŭrad ci pry ciapierašnich technałohijach možna adpravić čałavieka dalej, čym na Mars, ale prahrama Trampa zmoža natchnić navukoŭcaŭ i stymulavać technałahičnaje raźvićcio, što ŭ pierśpiektyvie dazvolić pašyryć prysutnaść čałavieka ŭ kosmasie.

Taksama čakajecca, što novaabrany prezident adnović pracu Nacyjanalnaha kaśmičnaha savietu, i ŭznačalić jaho vice-prezident Majk Pens. Metaj hetaj arhanizacyi budzie kaardynacyja hramadzianskaj, vajskovaj i kamiercyjnaj halin amierykanskaj kaśmičnaj industryi. Heta nieabchodna dla taho, kab, naprykład, NASA i SpaceX Iłana Maska nie budavali adnolkavyja kaśmičnyja aparaty, a supracoŭničali i technałahična dapaŭniali adzin adnaho.

• 0
• 0
• 0
• 0
• 0
• 0
• 0
• 0