Źniešni dziarždoŭh Biełarusi dasiahnuŭ $13,5 miljardaŭ

Dziaržaŭny doŭh Respubliki Biełaruś na 1 listapada skłaŭ 35,5 młrd rubloŭ i pavialičyŭsia ŭ paraŭnańni z pačatkam 2016 hoda na 2,6 młrd rubloŭ, abo na 8%, śviedčać dadzienyja Ministerstva finansaŭ.

Pry hetym źniešni dziarždoŭh pa stanie na 1 listapada skłaŭ 13,5 młrd dalaraŭ ZŠA, pavialičyŭšysia z pačatku hoda na 1 młrd 19,1 młn dalaraŭ, abo na 8,2%.

Pavodle dadzienych Minfina, u studzieni—kastryčniku 2016 hoda pryciahnuty źniešnija dziaržaŭnyja pazyki na 1 młrd 613,7 młn dalaraŭ ZŠA: 800 młn dalaraŭ — Jeŭrazijskaha fondu stabilizacyi i raźvićcia; 393,2 młn dalaraŭ — urada i bankaŭ Rasijskaj Fiederacyi; 313,2 młn dalaraŭ — bankaŭ KNR; 105,5 młn dalaraŭ — MBRR; 1,8 młn dalaraŭ — JEBRR i PIB.

Na pahašeńnie źniešniaha dziarždoŭhu z pačatku 2016 hoda nakiravana 719,2 młn dalaraŭ — ZŠA: 264,8 młn dalaraŭ — Jeŭrazijskaha fondu stabilizacyi i raźvićcia; 237,5 młn dalaraŭ — urada Rasijskaj Fiederacyi; 166,7 młn dalaraŭ — bankaŭ KNR; 49,4 młn dalaraŭ — MBRR; 0,7 młn dalaraŭ — ZŠA; 0,1 młn dalaraŭ — JEBRR i PIB.

Unutrany dziaržaŭny doŭh pa stanie na 1 listapada 2016 hoda skłaŭ 9,8 młrd rubloŭ, pavialičyŭšysia z pačatku hoda na 0,1 młrd rubloŭ, abo na 0,5%.

Za studzień—kastryčnik 2016 hoda raźmieščana ŭnutranych valutnych i rublovych dziaržaŭnych ablihacyj dla jurydyčnych i fizičnych asob na 1 młrd. 374,6 młn dalaraŭ ZŠA i 526,9 młn rubloŭ. Pahašana valutnych i rublovych dziaržaŭnych ablihacyj dla jurydyčnych i fizičnych asob na 1 młrd 419 młn dalaraŭ i 599,2 młn rubloŭ.

Na dumku šerahu ekśpiertaŭ, u biełaruskaha ŭrada niama inšych krynic pahašeńnia daŭhoŭ, akramia źniešnich zapazyčańniaŭ. U 2017 hodzie nieabchodna nakiravać na pahašeńnie dziaržaŭnaha doŭhu 5 młrd 232,2 młn rubloŭ. Pahašeńnie dziaržaŭnaha doŭhu ŭ zamiežnaj valucie składzie 2 młrd 311 młn dalaraŭ ZŠA.

Pry hetym u 2017 hodzie płanujecca pryciahnuć 1 młrd ŭ 860 młn dalaraŭ ZŠA (4 młrd 83,4 młn rubloŭ): za košt troch tranšaŭ kredytu Jeŭrazijskaha fondu stabilizacyi i raźvićcia — 700 młn dalaraŭ, vypusku jeŭraablihacyj — 800 młn dalaraŭ, vypusku ŭnutranych dziaržablihacyj — 360 młn dalaraŭ.

Nahadajem, za 2015 hod dziaržaŭny doŭh Biełarusi vyras na 131,1 trłn rubloŭ, abo na 66,4%, i na 1 studzienia 2016 hoda skłaŭ 328,6 trłn. rubloŭ. Pry hetym źniešni dziarždoŭh na 1 studzienia 2016 hoda skłaŭ 12,4 młrd dalaraŭ ZŠA, źmienšyŭšysia z pačatku 2015 hoda na 133,9 młn dalaraŭ (z ulikam kursavych roźnic), abo na 1,1%. Limit źniešniaha dziaržaŭnaha doŭhu Biełarusi na 2016 hod ustanoŭleny ŭ 17 młrd dalaraŭ — heta praduhledžana zakonam ab biudžecie. Limit unutranaha dziaržaŭnaha doŭhu na 2016 hod ustanoŭleny ŭ 115 trłn rubloŭ.

• 0
• 0
• 0
• 0
• 0
• 0