Mienš za pałovu mihrantaŭ, jakim admoŭlena ŭ pradastaŭleńni prytułku na terytoryi ES, adpraŭlajucca na radzimu, śviedčyć statystyka jeŭrapiejskaha pamiežnaha ahienctva Frontex. Pra heta piša EURActiv.com.
Pa słovach dyrektara ahienctva Fabrysa Łedžery, mierkavałasia, što kožny dzień z Hrecyi ŭ Turcyju budzie adpraŭlacca da 500 mihrantaŭ, jakija pranikli na terytoryju ES z dapamohaj nielehalnych pieravozčykaŭ. Adnak u realnaści hetaja sistema amal nie pracuje — pa situacyi na 8 śniežnia z hreckich vyspaŭ u Turcyju było nakiravana ŭsiaho 748 mihrantaŭ.
U cełym 42% mihrantaŭ, jakim było admoŭlena ŭ pradastaŭleńni prytułku, departavanyja ź ES. Hreckija ŭłady, pa słovach Łedžery, zanadta pavolna aceńvajuć, ci varty pretendent atrymańnia prytułku. U toj ža čas, Turcyja sa svajho boku dastatkova efiektyŭna vykonvaje abaviazki pa abmiežavańni nielehalnaj mihracyi ŭ ES.
Raniej paviedamlałasia, što hramadzianin Tunisa Anis Amry, jaki padazrajecca ŭ ździajśnieńni terarystyčnaha napadu ŭ Bierlinie 19 śniežnia, pretendavaŭ na atrymańnie prytułku. Niamieckija ŭłady admovilisia pradastaŭlać jamu status biežanca, adnak jon tak i nie byŭ departavany na radzimu.
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza19
Kamientary