Niečakanaje rašeńnie rasijskaha boku ab pahraničnych zonach na biełaruska-rasijskaj miažy stała siensacyjaj u ŚMI Biełarusi i Rasii. U MZS Biełarusi prakamientavali dziejańni RF.
«Nie varta zaraz dramatyzavać situacyju. My analizujem hety dakumient», — adznačyła ŭ kamientary TUT.BY namieśnik načalnika ŭpraŭleńnia infarmacyi — načalnik adździeła pres-słužby MZS Biełarusi Maryja Vańšyna, źviarnuŭšy ŭvahu na dva aśpiekty.
«Pa-pieršaje, nasupierak usim isnujučym damoŭlenaściam, jakija rehulujuć achovu dziaržaŭnych miežaŭ dźviuch krain i paradak ich pierasiačeńnia, rasijski bok pryniaŭ rašeńnie ab ustanaŭleńni pamiežnaj zony na miažy ź Biełaruśsiu biez papiaredniaha paviedamleńnia», — zajaviła jana.
Jak adznačajuć u MZS, heta nie pieršy padobny vypadak.
Takaja situacyja adbyłasia ŭ pačatku 2016 hoda, kali Rasija faktyčna pačała ŭvodzić abmiežavańni na ŭjezd hramadzian trecich krain praź miažu Biełarusi i Rasii. «Z ulikam uzroŭniu pramoha ŭzajemadziejańnia našych pamiežnych słužbaŭ i ich uzajemnaha pradstaŭnictva, padobnaja nieskaardynavanaść dziejańniaŭ, naturalna, vyklikaje spraviadlivyja pytańni», — adznačaje Vańšyna.
«Pa-druhoje, u mnohich składvajecca ŭražańnie, što hetyja dziejańni viaduć da adnaŭleńnia paŭnavartasnaha kantrolu na biełaruska-rasijskaj miažy, admienienaha bolš za dvaccać hadoŭ tamu. A heta idzie nasupierak cełamu šerahu isnujučych damoŭlenaściej, jakija praduhledžvajuć bazavy pryncyp adkrytaści miežaŭ pamiž Respublikaj Biełaruś i Rasijskaj Fiederacyjaj».
«Chaciełasia b asabliva padkreślić, što ŭ hetym vypadku inicyjatyva zychodzić nie ad biełaruskaha boku», — reziumavała načalnik adździeła pres-słužby MZS
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie1
Kamientary