Niderłandy adklikali dazvoł na pasadku samalota ministra zamiežnych spraŭ Turcyi Mieŭluta Čavušahłu praź niekalki hadzin paśla taho, jak jon pryhraziŭ uvieści «surjoznyja sankcyi» suprać Amsterdama. Pra heta paviedamlaje Hürriyet Daily News.
U zajavie hałandskaha ŭrada adznačajecca, što takoje rašeńnie pryniataje «ŭ suviazi z hramadskaj niebiaśpiekaj», jakuju niasie vizyt kiraŭnika tureckaha MZS u Raterdam. Adzin z pradstaŭnikoŭ uładaŭ adznačyŭ, što paśla taho, jak Ankara prystrašyła ŭvieści abmiežavalnyja miery, «było biessensoŭna šukać punkty sudakranańnia».
Jak adznačaje vydańnie, Čavušahłu pavinien byŭ adpravicca ŭ hałandski horad Raterdam 11 sakavika, adnak za niekalki hadzin da ŭźlotu stała viadoma, što jaho łajnieru nie dazvolili pasadku.
Paźniej prezident Turcyi Redžep Taip Erdahan raskrytykavaŭ hałandski ŭrad za rašeńnie nie puskać u krainu tureckaha ministra zamiežnych spraŭ Mieŭluta Čavušohłu, paviedamlaje Reuters.
Na mitynhu ŭ Stambule kiraŭnik dziaržavy nazvaŭ Niderłandy pieražytkam nacyzmu, a taksama fašyzmu.
Akramia taho, Erdahan pryhraziŭ Amsterdamu mierami ŭ adkaz, jakija buduć nasić lustrany charaktar. «Pahladzim, Hałandyja, jak paśla hetaha tvaje samaloty buduć latać u Turcyju. I ja kažu pra dypłamataŭ, a nie pra zvyčajnych hramadzian», — cytuje prezidenta TASS.
Tureckija čynoŭniki płanavali pravieści ŭ šerahu jeŭrapiejskich krain, dzie pražyvajuć hramadzianie Turcyi, sieryju mitynhaŭ, dla taho, kab zaručycca ich padtrymkaj napiaredadni refierendumu pa novaj Kanstytucyi, jaki adbudziecca 16 krasavika. Ułady Hiermanii, Aŭstryi i Niderłandaŭ zabaranili ładzić u siabie padobnyja mierapryjemstvy.
Mer Raterdama Achmied Abutaleb jašče 8 sakavika zajaviŭ, što zapłanavany ahitacyjny mitynh z udziełam kiraŭnika tureckaha zamiežnapalityčnaha viedamstva nie adbudziecca.
Ciapier čytajuć
Siarhiej Cichanoŭski pierabraŭsia žyć u Łos-Andželes68
Kamientary