Dźmitryjeŭ: Treba zasiarodzicca na adnoj maštabnaj akcyi — 1 maja
Adzin ź lideraŭ kampanii «Havary praŭdu!» Andrej Dźmitryjeŭ ličyć, što z praviadzieńniem akcyjaŭ suprać dekretu № 3, «Maršaŭ niedarmajedaŭ» treba spynicca i zasiarodzicca na adnoj vialikaj akcyi 1 Traŭnia i pravieści jaje pa ŭsioj Biełarusi.
Pry hetym Andrej Dźmitryjeŭ adznačaje źmienu stratehii arhanizataraŭ «Maršaŭ niedarmajedaŭ», akcyjaŭ suprać dekretu № 3: pravodzić tolki sankcyjanavanyja mierapryjemstvy:
«Heta ŭžo inšy padychod, asabliva što datyčycca pytańnia biaśpieki ludziej. Lideram zdajecca, što jany 2 tydni praviali za kratami, i im zaraz treba vyjści i pakazać, što jany nie złamanyja, što jany mohuć iści dalej. Ale heta ŭsio iluzija. Nichto nia ličyć ich złamanymi. Ale ciapier toj čas, kali treba spynicca, padumać, što my robim dalej, navošta my heta robim, zasiarodzicca na 1 Traŭnia i zrabić heta jakasna. Mnie dumajecca, voś takim čynam my damožamsia bolšaha.
Bo kali rabić navat sankcyjanavanyja akcyi davoli časta, to jany prosta stračvajuć sens. Bo ludzi bačać, što paśla akcyjaŭ ničoha nie mianiajecca, i robiać dla siabie vielmi prostuju vysnovu: vychodzić nia treba, bo nijakaha vyniku nia budzie. I heta vielmi niebiaśpiečna dla ŭsich nas, kali hramadztva zrobić takuju vysnovu.
Ja b na siońniašni dzień zafiksavaŭ: toje, što ludzi vyjšli — heta pośpiech, i vynik jość. Usio ž taki ŭłady prypynili dziejańnie dekretu № 3. Pryčym heta pośpiech supolny: i hramadztva, i apazycyi. Ale treba pracavać dalej. Ja b ciapier nie čaściŭ z praviadzieńniem akcyjaŭ. Bo praź miesiac budzie ŭžo Čarnobylski šlach, a za im — 1 Traŭnia.
Ja b skancentravaŭsia ciapier mienavita na 1 Traŭnia — bo samo śviata symbaličnaje, śviata pracy. I zasiarodziŭsia b nia tolki na admienie dekretu № 3, ale i na padvyšeńni dapamohi pa biespracoŭi, i na stvareńni ŭmoŭ dla raźvićcia małoha i siaredniaha biznesu, bo ŭ nievialikich haradach tolki jon moža vyciahnuć biespracoŭje. Mnie zdajecca, taki padychod moža dać vynik.
A kali ciapier praciahvać pravodzić akcyi, nu vyjdzie 40 ci 100 čałaviek, i heta moža stać syhnałam taho, što «ŭsio, pratestavaja chvala syšła, my ničoha nie damahlisia». Choć nasamreč damahlisia! I heta važna siońnia nia stracić.
A na 1 Traŭnia treba padavać paŭsiul zajaŭki, dzie ŭ demakratyčnych partyjaŭ i ruchaŭ jość struktury. I 1 Traŭnia pavinna stać adzinym ahulnanacyjanalnym dniom, kali my ŭzdymajem adno pytańnie — pytańnie biespracoŭja. I jano vielmi šmatbakovaje: heta i zarobki, i sacyjalnaja biaśpieka dla tych, chto stračvaje pracu, i stvareńnie novych pracoŭnych miescaŭ.
Kali 1 traŭnia akcyi projduć u dziasiatkach haradoŭ — i «Havary praŭdu!» da hetaha dałučycca, — tady my zmožam atrymać našmat bolšy rozhałas. I dakazać, što liderstva — heta nia toje, kali ty biažyš za padziejami, a toje, kali ty prymaješ adkaznyja rašeńni i sam farmuješ hetyja padziei».
Kamientary