«Nam zładzili pakazalny fars». Pasoł Ukrainy zaklikaje Minsk da adkrytaści na vučeńniach

Na apošnich biełaruska-rasijska-sierbskich vučeńniach «Słavianskaje braterstva — 2017» naziralniki zmahli ŭbačyć tolki «teatralizavany pakaz», a sami vučeńni prajšli bieź mižnarodnaha nazirańnia, zajaviŭ ambasadar Ukrainy ŭ Biełarusi Ihar Kizim. Vystupajučy z replikaj na kanfierencyi Ostrogorski Forum u Minsku, dypłamat zaklikaŭ biełaruskija ŭłady da bolšaj adkrytaści ŭ suviazi z budučymi vajskovymi vučeńniami «Zachad-2017» Biełarusi i Rasiei.

Pavialičyć

Svoj vystup pasoł Kizim pačaŭ z taho, čamu Biełarusi nie varta niedaaceńvać źniešnija pahrozy.

— Na žal, hibrydnyja vojny rychtujucca nie tady, kali jany pačalisia, a našmat raniej. U vypadku Ukrainy była zdrada z boku najvyšejšaha hienieralitetu, pačynajučy z taho, što apošnija namieśniki ministra abarony byli rasiejskimi hramadzianami.

Pavodle słoŭ pasła, u Kijeva byli vialikija nadziei na padtrymku mižnarodnaj supolnaści.

— Abarona kožnaj krainy — heta pierš za ŭsio sprava samoj krainy. Nadziei na partnioraŭ nie apraŭdalisia. My nie atrymali padtrymki, u tym liku i śmiarotnaj zbroi. Adabrańnie Kryma adbyłosia biez adzinaha strełu, tamu što my nie byli hatovyja da ŭzbrojenaj ahresii na pamiežnych pastach, jakija zachoplivalisia. Pa statucie luboj pahransłužby, sałdat pavinien byŭ stralać. Strełu nie było. Karystajučysia prapahandaj słavianskaha braterstva, my nie zmahli stralać u rasijskich sałdat. Spadziavalisia, što naviersie damoviacca. Nie damovilisia.

Ihar Kizim adznačyŭ, što va Ukrainie da pačatku vajny hetak ža, jak i siońnia ŭ Biełarusi, nie ličyli, što ŭ krainy jość źniešnija vajennyja pahrozy.

— Usie našy siły byli nakiravany na našych susiedziaŭ — nie, nie Biełaruś, inšyja krainy, u jakich da Ukrainy byli terytaryjalnyja pretenzii. Nichto ŭ 2013 hodzie nie moh pradbačyć taho, što zdaryłasia. Nie treba samazaspakojvacca, jość pahrozy, jakija niemahčyma ŭbačyć. Samaje strašnaje dla nas i karysnaje dla vas — heta toje, što ŭsie krainy zrabili vysnovu, na žal, na ŭkrainskim prykładzie. Toje, čaho my nie zmahli zrabić, na prykładzie Hruzii.

Dypłamat tłumačyć uzrosłuju aktyŭnaść NATA kala biełaruskich miežaŭ ahresiŭnymi pavodzinami Rasiei.

— Ale što cikava, kali ŭ Litvie i Polščy prachodziać vučeńni NATA, jany vyrazna dekłarujuć svaju zadumu: nie dapuścić rasijskaj ahresii ŭ Suvałckim kalidory (terytoryja Polščy i Litvy pamiž Biełaruśsiu i Kalininhradskaj vobłaściu. — Zaŭvaha. TUT.BY). Ci zadekłaravana zaduma vučeńniaŭ «Zachad-2017»? Nie, ciapier nie.

Pry hetym Kizim pryznaŭ, što pa normach ABSIE abvieścić pra heta Minsk pavinien minimum za miesiac da vučeńniaŭ, jakija pavinny prajści ŭ vieraśni.

— Tym nie mienš učora ci pazaŭčora prajšli vučeńni «Słavianskaje braterstva — 2017» Biełarusi, Rasii i Sierbii. Moj vajenny ataše pajechaŭ tudy, dla ich zładzili pakazalny fars. Im pakazali teatralizavany pakaz pa zachopie terarystyčnaj hrupy na dambie. Vielmi kłasna zroblena. A sami vučeńni prajšli ŭ inšym miescy, kudy nie zaprasili nivodnaha naziralnika, vajennaha ataše. Treba demanstravać bolšuju adkrytaść.

Pavodle słoŭ pasła Ukrainy, NATA ŭsprymaje Biełaruś «jak farpost Rasijskaj Fiederacyi, to bok Rasieju», i tamu takija aściarohi vyklikajuć sumiesnyja vučeńni.

— Kožny vybiraje svaju formu abarony svajoj biaśpieki. My vybrali svaju, vy — inšuju, i my heta pavažajem.

Pry hetym Kizim sa škadavańniem adznačyŭ, što mnohija analityki ŭ Biełarusi vykarystoŭvajuć ukrainski prykład z admoŭnaha boku.

— Heta padajecca ŭ takich formach: «Nam nie patrebny kanflikt, jak va Ukrainie, patrebna stabilnaść i h.d.». U vas budzie jašče niejki zapas vykarystoŭvać hetuju kartu tut. Ale nie treba rabić tak, što pieršaje, što ja pačuŭ, pryjechaŭšy siudy 2—3 miesiacy tamu, było: z Ukrainy idzie ŭsio drennaje, zavozicca zbroja, łoviać niejkich pierabiežčykaŭ, asudžajuć chłopcaŭ, jakija byli va Ukrainie, pa roznych pryčynach, pryčym absalutna nadumanych niejkich.

Dypłamat padkreśliŭ, što niezakonnaje pierasiačeńnie miažy — heta złačynstva, i Ukraina hatovaja supracoŭničać ź biełaruskimi ŭładami, kab spyniać takija vypadki.

Vučeńni «Zachad-2017» projduć u vieraśni, u ich płanujecca zadziejničać kala 3000 rasiejskich vajskoŭcaŭ i 280 adzinak vajennaj techniki. U krainach Bałtyi i va Ukrainie aścierahajucca, što paśla zakančeńnia vučeńniaŭ rasijskija vojski mohuć zastacca ŭ Biełarusi. Ministr abarony Biełarusi Andrej Raŭkoŭ nazvaŭ padobnyja zajavy «isteryjaj asobnych «ekśpiertaŭ». Alaksandr Łukašenka taksama zajaviŭ, što vučeńni nie niasuć pahrozy, i zaprasiŭ na ich naziralnikaŭ NATA.

• 0
• 0
• 0
• 0
• 0
• 0
• 0
• 0