Žychar Dobruša peŭny čas tamu stvaryŭ ankietu na adnym z sajtaŭ znajomstvaŭ. Voś tolki ŭ profili karystalnika abraŭ žanočy poł, a ŭ fotaalbom vykłaŭ zdymki nieprystojnaha źmiestu nieviadomaj madeli. Tak u siecivie źjaviłasia «Natalla», hatovaja razmaŭlać z karystalnikami na eratyčnyja temy.
«Adkrytyja fota nie mahli zastacca pa-za ŭvahaj adzinokich mužčyn, — prakamientavaŭ materyjały spravy śledčy Juryj Papieka miascovamu partału «Dobrušski kraj». — Biełarus vioŭ pierapisku adrazu ź niekalkimi patencyjalnymi žanichami z roznych krain. Z paciarpiełym hramadzianinam Ukrainy S., naprykład, «Natalla» mieła znosiny na praciahu dziesiaci miesiacaŭ».
Virtualnaja znajomaja tak spadabałasia žycharu Danieckaj vobłaści, što jon pryjechaŭ u Dobruš da virtualnaj kachanaj.
«U rajcentry žychara Danieckaj vobłaści sustreŭ toj samy mužčyna, jaki vystupaŭ u roli anłajn-pasii, — raspaviadaje śledčy. — Nazvaŭšysia bratam «Natalli», jon prapanavaŭ «abmyć» sustreču, pakul dziaŭčyna vyrašaje niejkija prablemy. Paśla sumiesnaha raśpićcia śpirtnoha na bierazie Ipuci paciarpieły pračnuŭsia z pustymi kišeniami. Navat torta i bukieta kvietak, ź jakimi jon pryjechaŭ na sustreču z «dabrušankaj», pobač nie apynułasia».
Zatoje pobač sałodka pasopvaŭ novy znajomy.
Daviedaŭšysia pra źniknieńnie hrošaj, biełarus zajaviŭ: nočču, vidać, «Natalla» prychodziła. Jana, maŭlaŭ, i zabrała źbieražeńni i padarunki. Paśla tłumačeńniaŭ miascovy žychar syšoŭ nibyta pa spravach.
Ukrainiec błukaŭ pa horadzie i sustreŭ milicyjantaŭ. Praź niekalki hadzin zatrymali i «Natallu» la ŭvachodu ŭ abmienny punkt. U kišeni jaho byli hrošy ŭkrainskaha «žanicha». Vinavaty nie admaŭlaŭsia i rastłumačyŭ: kišeni achviary jon pravieryŭ nočču, a zastaŭsia spać pobač, kab advieści ad siabie padazreńni.
Kamientary