Surviłła zaklikaje nie dapuścić padparadkavańnia biełaruskaj SPA Rasiei

Staršynia Rady BNR Ivonka Surviłła źviarnułasia z adkrytym listom da biełaruskaha narodu.

«Darahija surodzičy biełarusy, jak vy ŭžo, mahčyma, zaŭvažyli, źviartajusia da vas z adkrytymi listami redka, i tolki kali ŭvažaju, što žyćcio vašaje i biełaruskaja dziaržava ŭ vialikaj niebiaśpiecy, — havorycca ŭ liście Ivonki Surviłły. — Siońnia pišu vam ŭ suviazi z padziejami ŭ Hruzii i prajektam A. Łukašenki padpisać novyja vajskovyja damovy z Maskvoj.

U čas, kali ŭvieś demakratyčny śviet asudziŭ maskoŭskuju ahresiju suprać Hruzii Łukašenka pajechaŭ sustrakacca z pucinskim paplečnikam nie dziela taho, kab vystupić u abaronu pakryŭdžanaj suverennaj dziaržavy, a naadvarot – kab pavinšavać złačynnyja ŭłady susiedniaj imperyi ź ich «pryhožaj» ahresijaj».

«Darahija surodzičy, — piša staršynia Rady BNR, — z žalem hladžu, jak niekatoryja z vas, zamiest kab aburacca hetaj acenkaj padziejaŭ u Hruzii ad vašaha imia, vierać vierać kramloŭskaj prapahandzie i ŭvažajuć jaje słušnaj i prymalnaj. Dy kab heta było ŭsio! Ad vašaha imia, ad imia źniamiełaha biełaruskaha narodu, jakomu nie dazvolena vykazvać svaich zdarovych mierkavańniaŭ ni na hetuju, ni na nijakuju inšuju temu, ciesna źviazanuju ź jahonaj budučyniaj, kiraŭnik biełaruskaj dziaržavy abiacaje maskoŭskim satrapam uvachodzić ź imi ŭ novyja «abaronnyja» damovy, jakija iznoŭ uciahnuć naš narod u čužyja vojny i zrobiać jaho pieršaj achviaraj luboha kanfliktu Rasiei z reštaj śvietu».

«Darahija surodzičy, — źviartajecca staršynia Rady BNR da biełarusaŭ, — nie dazvolcie, kab takoje pahadnieńnie ździejśniłasia. Nie dazvolcie, kab varožyja vam ludzi handlavali vašaj radzimaj i vašym žyćciom! Vajskovaje pahadnieńnie z Maskvoj – heta novy zachop vašaha najdaražejšaha skarbu, ziamli vašych prodkaŭ, vašych dzietak, vašych unukaŭ.

Abaviazkam kožnaha z nas jość baranić hety Boham dadzieny nam kraj. Prašu Usiomahutnaha, kab danios da vas moj hołas. Kab vy pačuli i zrazumieli, da jakoj stupieni siońniašnija padziei pahražajuć vašaj budučyni. U dačynieńni da Hruzii, Rasieja pakazała svoj sapraŭdny tvar. Pakazała jašče raz, što paniaćci maralnaści i ludzkoj hodnaści dla jaje jość paniaćciami čužymi, niezrazumiełymi. Hetak, jak jana napała na maleńkuju Hruziju, hetak jana skarystaje pieršuju nahodu – albo prydumaje jaje – kab prysłać svaje tanki ŭ Biełaruś. Tady budzie zapozna, darahija surodzičy, baranicca. Baranicca treba ciapier».

«Ale pierad hetym pratestujcie ŭsimi siłami suprać zaklučeńnia pseŭda-abaronnaj damovy z Rasiejaj, bo staniecca jon našaj supolnaj mahiłaj», — zaviaršaje svoj list staršynia Rady BNR Ivonka Surviłła.

• 0
• 0
• 0
• 0
• 0
• 0
• 0
• 0