Archieołahi ź Sinhapura i Kambodžy, jakija pracujuć u rajonie staražytnaj stalicy Kchmierskaje impieryi Anhkor u ciapierašniaj kambadžyjskaj pravincyi Sijemryjep, u subotu 29 lipienia vyniali z-pad 40-santymietrovaha płasta ziamli dvuchmiatrovuju statuju vołata-achoŭnika. 800 hadoŭ tamu jana stajała kala bramy anhkorskaje balnicy, piša RIAN sa spasyłkaj na hazietu Cambodia Daily.
Statuja, jakaja, pavodle papiarednich acenak, adnosicca da XII stahodździa, stała pieršym bujnym pradmietam, znojdzienym u Anhkory za apošnija 6 hadoŭ. U 2011 hodzie niepadalok ad miesca subotniaj znachodki byli vyjaŭlenyja dźvie vialikija statui Budy, jakija adnosiacca da paźniejšaha času.
Statuju znajšli ŭ raskopie, zakładzienym u paŭnočnaj bramie horada Anhkor-Tchom, pabudavanaha ŭ praŭleńnie anhkorskaha impieratara Džajavarmana VII, jaki zrabiŭ hety horad svajoj stalicaj i pabudavaŭ u krainie 102 balnicy.
Znojdzienaja statuja demana-achoŭnika adroźnivajecca majsterskaj raźboj pa kamieni i maje vielizarnuju histaryčnuju kaštoŭnaść, navat niahledziačy na toje, što ŭ jaje adsutničajuć častki noh i ruk.
Kambadžyjskija i zamiežnyja archieołahi, jakija pracujuć u Anhkory, upeŭnienyja, što ŭ najbližejšaj budučyni ich čakajuć dzivosnyja i šmatlikija adkryćci, bo bolšaja častka «parku Anhkor» jašče tolki čyścicca ad džunhlaŭ, i mienavita ŭ hetaj znoŭ vyčyščanaj častcy buduć zakładzienyja novyja raskopy ŭ nastupnyja hady. Aerafotazdymkaj było paćvierdžana, što džunhli na nierasčyščanych učastkach chavajuć jašče adzin, pakul zusim nieviadomy, horad epochi Anhkor.
Što za čamadan nosić kala Łukašenki jahony achoŭnik? Nie, tam nie jadziernaja knopka18
Kamientary