Vyjšaŭ zachaplalny mulcik pra historyju Biełarusi ŭ šarykach VIDEA
U siaredzinie žniŭnia na Jutubie vyklili videa «COUNTRYBALLS. Historyja Biełarusi». Litaralna za paru tydniaŭ multfilm nabraŭ zvyš za 400 tysiač prahladaŭ.
Što takoje Countryballs? U litaralnym pierakładzie country značyć «kraina», a balls — «šaryki, miačyki». Heta takija komiksy pra krainy, dzie piersanažy adlustroŭvajucca ŭ formie šarykaŭ, a rasfarbavanyja jany ŭ koler ściahoŭ svaich krain.
Sioleta ŭ internecie stali źjaŭlacca roliki ab historyi krain u šarach. Užo vyjšaŭ rasijski, tydzień tamu taksama pabačyŭ śviet ukrainski. Varta adznačyć, što biełaruski siarod ich najdaŭžejšy — až 23 chviliny.
Pačynajecca ŭsio vielmi prosta: praščury siońniašnich biełarusaŭ palujuć na mamantaŭ i łoviać rybu, dzieści na terytoryjach, dzie isnujuć hory. Tolki praź niejki čas jany prychodziać u basiejn Dniapra i Prypiaci.
Užo na terytoryi sučasnaj Biełarusi ludzi pačynajuć budavać damki, hadavać karovaŭ, siejać žyta. Karaciej, zajmacca samymi zvyčajnymi paŭsiadzionnymi spravami. Vielmi cikava pakazany padzieł na kryvičoŭ, dryhavičoŭ, radzimičaŭ.
Pieršy piersanaž (na im sučasny hierb Połacka), jakoha možna paznać, — heta Rahvałod. Połackaha kniazia zabivaje Uładzimir i zabiraje hvałtam Rahniedu.
Mabyć, niama sensu daskanała pierakazvać usie histaryčnyja pierepietyi, što adlustravanyja ŭ mulcie: šmatlikija vojny Połackaha kniastva, uzvyšeńnie Navahradka, baraćba z tatarami, Francišak Skaryna, Hrunvaldskaja bitva.
Vielmi šmat u roliku vojnaŭ z Rasijaj. Faktyčna, heta asnoŭny supiernik, z kim viadzie baraćbu naš šaryk. Cikava, jak padčas Livonskaj vajny Russball ustaloŭvaje svoj ściažok nad Połackam. U vyniku VKŁ vymušanaja iści prasić dapamohu ŭ Polščy, što vylivajecca ŭ Lublinskuju ŭniju. VKŁ idzie na hetaje padpisańnie vielmi sumna i nie chočučy.
Na novym šaryku Rečy Paspalitaj adziety drahunski šlem, a ŭ supravadžeńni hraje kłasičnaja polskaja pieśnia Hej, sokoły. Dalej iduć Iłžedźmitryj, rubiłava sa Šviecyjaj i Rasijaj.
U vyniku Rasija ŭsio boleła i boleła, macnieła i macnieła. Šaryk Rečy Paspalitaj byŭ zahnany ŭ ciomny kut, ź inšych bakoŭ padyšli Prusija i Aŭstryja. Navat budučy ŭžo abrubkam, Reč Paspalitaja ŭsio adno jašče machałasia šabielkaj, choć šancaŭ nie było nijakich.
Našy hubierni (amal usie hierby z Pahoniaj) apynulisia na łancuhu ŭ Rasii. Pryskakaŭ Napaleon, zalez viercham na nas. Byli sproby vyrvacca, ale suprać Rasii, u jakoj była ahniastrelnaja zbroja, naš šaryk išoŭ z kosami. Aluzija na paŭstańni 1830 i 1863 hadoŭ.
Kali pačałasia Pieršaja suśvietnaja, to tolki i zastavałasia, što stajać z šyroka raspluščanymi vačyma dy nazirać za padziejami.
Tolki paru siekund uźniosłaj muzyki prahučała adnosna padziej 1918 hoda, kali abvieścili BNR. A ŭžo praź niejki čas Biełaruś znoŭ padzielenaja na ahryzački: saviecki i polski. U savieckaj častcy ludzi ŭ furažkach stralali ŭ patylicu šarykam z nadpisam BSSR i skidvali trupy ŭ braterskuju mahiłu.
Mužna i samaaddana my kidalisia ŭ baraćbu z šarykami sa svastykaj, choć potym biełarusaŭ palili ŭ chlavach. Vielmi vobrazna pierasensavanaja słavutaja karcina Vołkava «Vyzvaleńnie Minska».
Saviecki čas — heta Salihorsk, pieršyja kasmanaŭty, mietro ŭ Minsku. Kali ŭ 1986 vybuchnuŭ Čarnobyl, to ŭ našaha šaryka źjaviłasia treciaje voka.
Kaniec 1980-ch — heta pieršyja pratesty. Našy šaryki ŭsio jašče ŭ ściahach BSSR, ale trymajucca nad saboj bieł-čyrvona-biełyja pałotniščy. Paznavalny vobraz šaryka, jaki prymaje Kanstytucyju nad Pahoniaj, a potym vykidvaje hety samy hierb.
Znoŭ u čyrvona-zialonaj hamie Biełaruś biehaje z braterskimi abdymkami za Rasijaj. Znajšli svajo adlustravańnie ŭ videa Płošča-2010, vybuch u mietro. Biełaruski šaryk sumna naziraje za bojkaj Rasii i Ukrainy. Jość navat pra niadaŭni «nałoch na tuniejaccaŭ».
U kancy jość pieralik, što značyć toj ci inšy šaryk.
Taki voś multfilm vyjšaŭ. Cikava, jak jaho aceniać u samoj Biełarusi i za jaje miežami?
Ciapier čytajuć
Mabilny Anžaliki Mielnikavaj z 19 sakavika znachodzicca na terytoryi Biełarusi52
Kamientary