Ministr zamiežnych spraŭ Litvy Linas Linkiavičus zaklikaŭ Rasiju admianić zapłanavanyja vajennyja vučeńni «Zachad-2017» na ŭschodnim fłanhu NATA, paviedamlaje DW.
«My zaniepakojenyja tym, što Maskva pierakinuła ŭ Biełaruś i da miežaŭ Bałtyi 4 tysiačy sistem, zdolnych nieści jadziernuju zbroju, i nie mienš za 30 tysiač sałdat. Hetaje niebiaśpiečnaje brazhańnie zbrojaj pavinna spynicca», — zajaviŭ jon u intervju miedyja-hrupie Redaktionsnetzwerk Deutschland.
Linkiavičus nazvaŭ niepraŭdapadobnym rasijskija danyja ab tym, što ŭ vučeńniach voźmuć udzieł 12 tysiač vajskoŭcaŭ. «My pavinny być pilnymi i padrychtavanymi», — padkreśliŭ jon. Pa słovach kiraŭnika litoŭskaj dypłamatyi, Rasija ŭ apošni čas štotydzień ździajśniała ŭ siarednim pa 10 tajemnych palotaŭ nad terytoryjaj krain NATA ŭ Bałtyi.
Kiraŭnik dypłamatyčnaha viedamstva taksama adznačyŭ, što, u adroźnieńnie ad vučeńniaŭ «Zachad-2013», Rasija, u ramkach ciapierašnich vučeńniaŭ, upieršyniu pierakidaje vojski ŭ Biełaruś. «My aścierahajemsia, što rasijskaja vajskovaja prysutnaść u Biełarusi stanie pastajannaj», — adznačyŭ jon. U hetaj suviazi Linkiavičus nahadaŭ pra toje, što anieksija Kryma ŭ 2014 hodzie taksama pačynałasia z vajennych vučeńniaŭ.
Na Zachadzie miarkujuć, što Maskva śviadoma zaniziła danyja ab kolkaści ŭdzielnikaŭ vučeńniaŭ «Zachad-2017», kab nie zaprašać zamiežnych naziralnikaŭ. Ministr abarony FRH Ursuła fon der Lajen dniami zajaviła, što ŭ manieŭrach «Zachad-2017», chutčej za ŭsioi, voźmuć udzieł kala 100 tysiač vajskoŭcaŭ.
Kamientary