Top-20 krutych prostych rečaŭ na kuchniu ad biełaruskaha dyzajniera FOTY
Tak, nam taksama niaprosta pavieryć, što zvyčajnaja doška dla narezki moža vyhladać nastolki stylova.
My zazirnuli ŭ albom #dobryjarečy Źmitra Smalarova i znajšli tam šmat cikavaha.
«Doški, łyžki i inšyja dobryja rečy dla mianie stali čymści asabistym. Kožnaja maje svoj koler, svaju formu, taksama vykarystoŭvaju roznyja materyjały. Chočacca, kab maje vyraby prynosili dobry nastroj i estetyčnaje zadavalnieńnie, — kaža Źmicier i raspaviadaje, što jaho natchniaje: — Pa-pieršaje, maja kachanaja. Vielmi pryjemna bačyć cikavaść i niejkuju radaść ad maich rabot. Pa-druhoje, idei, natchnieńnie źjaŭlajucca niejak sami saboj. Dumaju, ad asiarodździa, pryrody, dobraha nastroju, žadańnia prynieści radaść siabram i rodnym».
Źmicier tłumačyć, što #dobryjarečy — heta sproba adpačyć ad asnoŭnaj pracy. Jon kanstrujuje meblu ŭ Rasii. Miesiac-dva pravodzić tam, a potym pryjazdžaje damoŭ, u Biełaruś.
«Składana ŭvieś čas praktyčna bieź siamji, — pryznajecca majstra. — Pracuju da 19 hadzin, vyrašyŭ, kab darma nie marnavać čas, paśla pracy zajmacca dekaratyŭna-prykładnym mastactvam. Voś užo amal dva hady prajšło, maru, što heta nievialikaje chobi kaliści pieratvorycca ŭ niešta bolšaje».
Źmicier nie biarecca davać vyznačeńnie, što takoje biełaruski styl, ale, tym nie mienš, uvieś čas sprabuje jaho namacać.
«Šukaju, spadziajusia jaho znajści, — kaža jon. — Chočacca niečaha śviežaha, jak ranica ŭ vioscy, i staražytnaha, jak biełaruskaja historyja. I kab u toj ža čas heta była sučasnaja stylovaja reč z usimi biełaruskimi markierami».
Darečy, sam Źmicier naradziŭsia na Śvietłahorščynie ŭ vioscy Viarchleśsie. Majstra kaža, što chiba sama nazva vioski dy navakolny les padšturchnuli jaho zaniacca drevam.
Kamientary