Kala 50 tysiač rabot aŭtaraŭ z 92 krain byli pradstaŭlenyja na 53-m mižnarodnym konkursie zdymkaŭ dzikaj pryrody Wildlife Photographer of the Year Award. DW piša pra pieramožcaŭ.
Hałoŭny pryz konkursu
Čornaha nasaroha, zastrelenaha brakańjerami, jakija pakvapilisia na jaho roh, sfatahrafavaŭ u adnym z paŭdniovaafrykanskich zapaviednikaŭ ńju-jorkski fatohraf, uradženiec PAR Brent Ścirtan. Muziej pryrodaznaŭstva ŭ Łondanie abviaściŭ hetuju pracu pieramožcam konkursu. Na Ziamli zastałosia kala 5000 čornych nasarohaŭ.
Naminacyja «Najlepšy małady fatohraf»
Na fatahrafii, zroblenaj u džunhlach Respubliki Konha — raŭninnaja haryła, jakaja lažyć siarod dreŭ i trymaje adnoj łapaj kakosavy arech. Aŭtar hetaha zdymka — fatohraf ź Niderłandaŭ Daniel Nelsan.
Naminacyja «Juny fatohraf, uzrost 11-14 hadoŭ»
Chałodny pachmurny dzień. Hłyboki śnieh pakryŭ dalinu Łamar ŭ Jełaŭstonskim nacyjanalnym parku, raźmieščanym u štacie Vajominh, ZŠA. Hetaja lisa palavała pobač z darohaj, jak raptam znajšła husinaje jajka. Na zdymku adlustravany momant, kali jana sprabuje zakapać znachodku. Aŭtar zdymka — amierykaniec Ešli Skali.
Naminacyja «Mlekakormiačyja»
Hetych hareźlivych kašałotaŭ źniaŭ suśvietna viadomy majstar padvodnaj fotazdymki Toni Vu, jaki naradziŭsia ŭ Kitai. Zdymak zrobleny ŭ akvatoryi la ŭźbiarežža Šry-Łanki. U pryrodzie ŭ kašałota praktyčna niama vorahaŭ. Zatoje palavańniem na jaho doŭha zajmaŭsia čałaviek. Jano spyniłasia tolki try dziesiacihodździ tamu. I ciapier pahałoŭje kašałotaŭ, jakoje mocna skaraciłasia, pavolna, ale adnaŭlajecca.
Naminacyja «Adzinočny zdymak»
Amierykanski fatohraf Džaścin Chofman časta ŭdzielničaje ŭ mižnarodnych ekałahičnych ekśpiedycyjach, zadača jakich — pakłaści kaniec zabrudžvańniu suśvietnaha akijana. Padčas adnoj ź ich, kali jon zajmaŭsia zdymkami la ŭźbiarežža indanezijskaha vostrava Sumbava, u abjektyvie jaho kamiery akazaŭsia marski kaniok, jaki schapiŭ vatovuju pałačku, što płavała ŭ brudnaj vadzie siarod śmiećcia — mabyć, pryniaŭ jaje za vodaraści.
Naminacyja «Ptuški»
Aŭstralijskaja chmyźniakovaja indyčka adkładaje jajki prosta pobač z domam aŭtara hetaha zdymka Džery Pirsa na ŭskrainie Sidneja. Cikava toje, što hetyja ptuški nie vysiedžvajuć svaje jajki, a zakopvajuć ich u miescach, dzie zabiaśpiečvajecca nieabchodnaja dla inkubacyi tempieratura. Tut indyčka zasypaje jajki raślinnymi reštkami, što hnijuć pad dziejańniem mikraarhanizmaŭ.
Naminacyja «Amfibii i reptylii»
Amierykanskamu fotareparcioru Brajanu Skiery ŭdałosia sfatahrafavać skurystuju marskuju čarapachu. Heta adzin z najstarejšych vidaŭ čarapach u śviecie, jaki ciapier znachodzicca pad pahrozaj źniknieńnia. Skiey źniaŭ čarapachu ŭ rieziervacie Sandzi-Pojnt la vostrava Santa-Krus, što naležyć da Virhinskich astravoŭ ZŠA, na plažach jakich čarapachi adkładajuć jajki.
Na Šry-Łancy ŭ 37 hadoŭ pamior biełaruski kinapradziusar Andrej Matałyha3
Kamientary