Hurt Vuraj napisaŭ pieršuju pieśniu ŭ svajoj historyi na vierš paeta, u jakoj pieradaŭ u muzycy ŭsio jahonaje žyćcio. Dla prajektu TuzinFM «(Nie)rasstralanaja paezija» kamanda Siarhieja Doŭhušava pakłała na muzyku tvor Jurki Lavonnaha.
Dla hurtu Vuraj udzieł u prajekcie «(Nie)rasstralanaja paezija» nadzvyčaj važny. «Chto kali nia my, muzyki, mohuć dać novaje žyćcio tvoram zabitych paetaŭ. Hetaja tema balučaja, schavanaja ad usich nas i mocna aktualnaja na sionnia. I my, pierajemniki tych paetaŭ, musim skazać svajo słova, kab adradzić pamiać pra ich», — kaža Siarhiej Doŭhušaŭ. Jon znajomy z tvorami represavanych litarataraŭ pa knizie «Rasstralanaja litaratura», što vychodziła ŭ seryi «Biełaruski knihazbor». A padčas pracy nad hetym prajektam, bližej paznajomiŭsia z tvorčaści paeta Jurki Lavonnaha.
Pieśnia «Nastroi» pavodle tvoru «Zimovaja radaść» — pieršy eksperyment hurtu Siarhieja Doŭhušava ŭ napisańni pieśni na vierš biełaruskaha paeta. I praces stvareńnia byŭ nia mienš składanym, čym praca z narodnym śpievam. Usie muzyki padyjšli da hetaj spravy z usioj ščyraściu i addanaści. Praca doŭžyłasia niekalki miesiacaŭ, za hety čas kampazycyja niekalki razoŭ mianiała svaju formu i ŭrešcie była zafiksavanaja ŭ studyi. «Pieśnia atrymałasia atmasfernaj, sa svajoj dramaturhijaj. Jana natchniaje na rozdum, — raspaviadaje Siarhiej. — U joj my chacieli pieradać svajo adčuvańnie paezii Lavonnaha i trahiedyju jahonaha žyćcia, tamu jana stvoranaja ź niekalkich kantrasnych častak. Jany ilustrujuć jak źmianiałasia žyćcio junaka, kali vierš hučyć pad meladyčnuju ramantyčnuju muzyku, a potym nastroj źmianiajecca — paeta aryštoŭvajuć, katujuć, rasstrelvajuć. Radaść źmiešvajecca z bolem, nadzieja pieraŭtvarajecca ŭ biezvychodnaść. Voś što my ŭbačyli ŭ hetym vieršy».
Jurka Lavonny (Leanid Jurkievič) pačynaje drukavacca ŭ 16 hod, u hetym ža ŭzroście jaho prymajuć u «Maładniak». U 25 hod — jon užo pavažany žurnalist, krytyk, aŭtar šaści ŭłasnych zbornikaŭ. Siabry apisvali jaho jak «statnaha i pryhožaha junaka artystyčnaha składu». Ale ŭ 28 hod jaho aryštavali niby za špijonska-dyversijnujudziejnaść. Hod katavali ŭ turmie i rasstralali 29 kastryčnika 1937-ha. U hetym ža hodzie vyjšaŭ biełaruski pierakład Žiula Verna «20000 lje pad vadoj», jaki zrabiŭ Lavonny razam ź Siarhiejem Hrachoŭskim. Tolki imiony pierakładčykaŭ byli vykraślenyja ź knihi. Padrabiaźniej pra Jurku Lavonnaha raspavioŭ u lekcyi prajektu «(Nie)rasstralanaja paezija» daśledčyk Viktar Žybul.
Hurt Vuraj maje namier vykonvać hety tvor na svaich kancertach. Taksama muzyki chočuć źniać na «Zimovuju radaść» klip.
Vuraj — Nastroi
muzyka hurtu, słovy Jurki Lavonnaha
TuzinFM
Jość nastroi… A ŭ ich — pieralivy.
Jość časiny — zdajucca snom.
Tolki toj na śviecie ščaślivy,
Chto ŭzimku žyvie, jak viasnoj!
Ja staju adzinoki na poli,
Cicha syplecca zołkaŭ piasok…
Raspranuŭsia viecier — i hoły
Pa ralli — u karahodny skok!..
Dub hallo pabialełaje źviesiŭ,
I nia viedaju — moža, uva śnie
Pavaliŭsia zialony miesik
Na kaleni ŭ srebny śnieh…
Viecier šepča lichija pahrozy —
Kolki złości… Kudy ž jaje dzieć?..
Prytulili b mianie vy, marozy,
Da asmužanych biellu hrudziej!..
Ja razdumaŭ — nia vylju ślazami,
Za mianie — chaj skryhoča zima…
Oj ty, zamieć, sivaja zamieć,
Pryhažej za ciabie — niama!..
(1927)
Amal usie čaty i supołki kałonij i SIZA Biełarusi pryznali ekstremisckimi farmavańniami. Pad pahrozaj tysiačy čałaviek5
Kamientary