Były hałoŭny strateh Biełaha doma Styŭ Benan «pazbaviŭsia rozumu», paśla taho jak straciŭ pracu ŭ Biełym domie, zajaviŭ prezident ZŠA Donald Tramp.
Tramp abrynuŭsia z abvinavačvańniami na Benana za toje, što toj — jak śćviardžajecca ŭ jašče nie apublikavanaj pakul knizie — nazvaŭ sustreču pamiž synam Trampa i hrupaj rasiejcaŭ napiaredadni vybaraŭ «zdradaj».
Na sustrečy ŭ červieni 2016 hoda, za niekalki miesiacaŭ da prezidenckich vybaraŭ u ZŠA, rasijanie prapanavali Donaldu Trampu-małodšamu kampramat na Chiłary Klintan.
Kniha napisana pa vynikach bolš čym 200 intervju z samim prezidentam, jaho najbližejšym asiarodździem i inšymi vysokapastaŭlenymi supracoŭnikami Biełaha doma i ŭpłyvovymi vašynhtonskimi palitykami.
U pryvatnaści, u knizie śćviardžajecca, što złaščasnuju sustreču syna prezidenta i inšych členaŭ pieradvybarčaha štaba Trampa z Natallaj Viesialnickaj u «Tramp-taŭer» Benan nazvaŭ «zdradnickaj» i «niepatryjatyčnaj».
«U Styva Benana niama ničoha ahulnaha sa mnoj abo z maim prezidenctvam. Kali jaho zvolnili, jon nie tolki straciŭ pasadu, jon jašče straciŭ rozum», — zajaviŭ u adkaz Tramp.
«Styŭ byŭ supracoŭnikam, jaki pracavaŭ na mianie ŭžo paśla taho, jak ja atrymaŭ naminacyju [ad respublikancaŭ], abyšoŭšy 17 kandydataŭ, jakich nazyvajuć adnoj z samych talenavitych hrup pretendentaŭ, jakuju kali-niebudź źbirała Respublikanskaja partyja», — dadaŭ jon.
«Ciapier, kali Styŭ puściŭsia ŭ adzinočnaje płavańnie, jon zrazumieŭ, što pieramahać nie tak prosta, jak moža zdacca, hledziačy na mianie. Styŭ mała što zrabiŭ dla našaj histaryčnaj pieramohi, jakuju zabiaśpiečyli zabytyja mužčyny i žančyny hetaj krainy», — zajaviŭ prezident.
Były hałoŭny strateh Biełaha doma Styŭ Benan ličyŭsia adnym z asnoŭnych hulcoŭ u kamandzie Trampa. Mienavita jon dapamoh Trampu sfarmavać kampaniju pad łozunham «Amieryka — pierš za ŭsio», pierš čym pakinuŭ svaju pasadu ŭ žniŭni 2017 hoda.
Kamientary