Chłopiec na zakład haniaje pa Śvisłačy na elektrasiorfie VIDEA

Kirył vyras u Sierabrancy, 10 hadoŭ pravioŭ tam, dzie nie varta było znachodzicca, a paźniej zachapiŭsia ekstremalnymi vidami sportu. Viejkbord, parapłan, dajvinh, u tym liku padlodny — hety chłopiec praviaraje siabie na tryvałaść samymi roznymi sposabami.

Hetym razam vyrašyŭ prakacicca pa centry Minska na elektrasiorfie. Niebiaśpieka tut nie ŭ chutkaści, a chutčej u pieraškodach, ad jakich treba było ŭmieła sychodzić.

— Naohuł moj elektrasiorf razhaniajecca zvyčajna da chutkaści 45 km/h, ale pierad mastami ja trochi źnižaŭ chutkaść dzieści da 27 km/h. Startavaŭ na Śvisłačy kala parku Janki Kupały, a finišavaŭ na vuł. Daŭmana kala damby. Usiu adlehłaść pieraadoleŭ chvilin za 12.

Na pytańnie «navošta?» Kirył ščyra adkazvaje, što zrabiŭ heta na zakład.

— Mnie kazali: ty kataješsia i tam i tut, a možaš u centry Minska prakacicca? Ty ž nie baišsia ničoha? I ja heta zrabiŭ.

— Było strašna?

— Technična — nie. Ale ŭ nas ža na hidracykłach nichto nie katajecca pa Śvisłačy, a ich u ludziej šmat. Ja dumaju, što heta moža być zabaroniena, — dzielicca zdahadkami. I dadaje: jon hatovy zapłacić štraf za svaje pakatuški.

Kali kazać u cełym pra ekstrym, to zajmajecca im Kirył, kab «razhruzić hałavu».

— Ja zaraz kiruju budoŭlaj, sa składanymi zakazčykami ŭzajemadziejničaju. I hałava da kanca tydnia stanovicca kamiennaj … chtości idzie viečar u piatnicu ŭ bar, a ja voś takim sportam zajmajusia. Ekstrym dapamahaje mnie adciahnucca ad pracy i pryvieści ŭ paradak dumki.

Voś dla prykładu jašče adna ekstremalnaja pajezdka Kiryła. Studzień, Kamčatka, na vulicy minus 17, jakoj siły viecier, navat składana sabie ŭjavić … a chłopiec katajecca na viejkbordzie.

— Kali chłopiec-ekstremał katajecca na došcy ŭ vyratavalnaj kamizelcy i nie zachodzić u akvatoryi sudnachodnaha šlachu abo plažu, znachodzicca ŭ poŭnaj śviadomaści — tady pramych parušeńniaŭ niama. Ale tut treba ŭličvać i zdarovy sens, bo na vialikaj chutkaści možna vielmi baluča stuknucca ab vadu i atrymać cialesnyja paškodžańni, — papiaredžvajuć u Tavarystvie vyratavańnia na vodach.

• 5
• 0
• 0
• 2
• 1
• 0
• 0
• 0