Były siabar prałukašenkaŭskaj Kampartyi staŭ «hienieralnym sakratarom» ruchu Statkieviča. Chto taki Siarhiej Sparyš?
U atačeńni Mikoły Statkieviča źjaviŭsia dahetul nieviadomy čałaviek — Siarhiej Sparyš.
Niekalki dzion tamu hety aktyvist byŭ abrany hienieralnym sakratarom palityčnaj arhanizacyi Statkieviča — arhanizacyjnaha kamiteta pa stvareńni partyi BSDP «Narodnaja Hramada».
I mienavita jaho Statkievič vyłučyŭ u skład «pieramoŭščykaŭ» ź Minharvykankamam ad Arhkamiteta pa śviatkavańni stahodździa BNR.
Ale što heta za čałaviek?
Pachodzić Sparyš z Hrodna, jamu 31 hod.
Chłopiec pa prafiesii muzykant — skončyŭ kaledž u Hrodnie, potym try hady vučyŭsia ŭ akademii, ale nie skončyŭ jaje.
Siem hod adpracavaŭ zvarščykam, bolšaść času — na Minskim zavodzie kołavych ciahčačoŭ. Zvolnili jaho adtul, kaža jon, za «publikacyju na Chartyi». Pakul nie pracuje.
A palityčny šlach u jaho mudrahielisty — Siarhiej byŭ aktyvistam prałukašenkaŭskaj Kamunistyčnaj partyi, potym adkałoŭsia ad jaje. I paśla vahańniaŭ dałučyŭsia da ruchu Statkieviča.
Voś jak jon apisvaje heta sam:
«Paśla maršaŭ niedarmajedaŭ u mianie ŭtvaryłasia nievialikaje koła znajomych. I było žadańnie stvaryć niejkija paralelnyja apazicyjnyja sietkavyja struktury. Adčuvaŭ, što mahčymyja pieramieny kštałtu Majdanu, — kaža Sparyš u adkaz na pytańnie, što pryviało jaho da Statkieviča. — Ale kali ja ŭbačyŭ, na što zdolnyja apazicyjnyja siły, uźnikła rasčaravańnie i razumieńnie, što ja ŭ čymści pamylajusia. Tady ja pryjšoŭ da Statkieviča jak da adnaho z najbolš radykalnych. I ŭźnikła žadańnie pahavaryć ź im, ź jaho ludźmi. Kali paznajomiŭsia, to ŭźnik davier. Ustupiŭ u partyju sam taho nie čakajučy, u toj ža dzień».
U ruchu Siarhiej mienš za hod, a ŭžo — «hienieralny sakratar». Čym tłumačycca taki karjerny ŭźlot?
«Pa-pieršaje, heta niedabor aktyvistaŭ. Pa-druhoje — razumieńnie kiraŭnictva, što patrebna amaładžeńnie», — razvažaje Sparyš.
Svoj udzieł u kamunistyčnaj partyi aktyvist nazyvaje pamyłkami maładości i pikiroŭkaj z baćkami: jon — syn staršyni hrodzienskaha adździaleńnia Sajuza mastakoŭ. I nasupierak baćkam z beneefaŭskimi pohladami «pačaŭ nastalhavać pa tym, čaho nie bačyŭ». Ciapier siabie jon apisvaje tak: «ja nie ruskamirac, ale i nie prazachodni».
Karystajučysia vypadkam, my spytalisia, jak jon — hienieralny sakratar ruchu Statkieviča — stavicca da nieadnaznačnych paplečnikaŭ.
Jak viadoma, kiraŭnica mahiloŭskaha adździaleńnia ruchu znachodzicca ŭ siabroŭskich adnosinach da prarasijskaha aktyvista Hałavina, jaki vychodziŭ z rasijskim ściaham na płošču Niezaležnaści ŭ Minsku.
«Heta pytańni da jaje. Ale jość prablema, što ludziej mała, i jany majuć roznyja pohlady. Nie ŭsie sacyjał-demakraty, ale jany prychodziać da Statkieviča. I prosta tak adšturchoŭvać ad siabie aktyvistaŭ… my nie majem prava, mnie zdajecca. Tak, u jaje jość niekalki vykazvańniaŭ, ale…», — padsumavaŭ jon.
My taksama spytalisia pra los čałavieka, jaki byŭ najbližejšym paplečnikam Statkieviča letaś — Siarhieja Kunceviča. Nahadajem, toj śćviardžaŭ, što jaho katavali ŭ SIZA KDB elektrašokieram. A paśla vyzvaleńnia abrynuŭsia na Mikołu Statkieviča ź nieadekvatnaj krytykaj.
«Jon ad pačatku byŭ nie zusim narmalnym, my ź im suviaź nie padtrymlivajem», — skazaŭ Sparyš.
Čytajcie taksama: Fryk z «NOD», militaryst, kiraŭnik pradpryjemstva… Chto vyjšaŭ na pikiet u padtrymku Rasii?
«Vielmi dobra razumieju biełaruskuju movu. Navat nie dumaŭ». Źjaviłasia VIDEA razmovy biełaruskich palitviaźniaŭ ź Zialenskim12
«Vielmi dobra razumieju biełaruskuju movu. Navat nie dumaŭ». Źjaviłasia VIDEA razmovy biełaruskich palitviaźniaŭ ź Zialenskim
Babaryka i Kaleśnikava pahavaryli ź Inhaj Ruhinienie i zaklikali Litvu «dałučycca da dypłamatyčnych namahańniaŭ ZŠA» i «nie prapuścić akno mahčymaściej»3333
Kamientary