Pieśnia hodu — «Biełakryły anioł»

Alternatyva hodu

Bolšaść ekspertaŭ najlepšaj nieaficyjnaj pieśniaj hodu nazyvajuć "Biełakryłaha anioła" ŭ vykanańni "Zet". Pieśnia zaniała pieršaje miesca ŭ vynikovym tury ŭ hit-paradzie "Tuzin hitoŭ". "Heta adna z hienijalnych kampazycyj biełaruskaha roku", - kaža kiraŭnik polskamoŭnaha sajtu pra biełaruskuju muzyku "Zona" Łukaš Stepaniuk. Muzyčny krytyk Anatol Mialhuj tłumačyć pośpiech "Anioła" tym, što "Zet" u hetym tvory nabližajecca da svajho alter-eha - "N.R.M.", jakija śpiavali nadzionnyja pieśni.

U šefa "BMA Group" Vitala Supranoviča - svaje favaryty. Na pieršym miescy - "Majo serca": duet Dzianisa Viačerskaha z "Partyzone" i vakalistki "Indiga" Rusi, a taksama "Piśnia Čuhajstera" - apracoŭka adnaho z hitoŭ "Gods Tower", zapisanaja ŭkrainskim hurtom "Tiń soncia": "Ukraincy źmianili tekst, zachavaŭšy ideju: jak azmročvajecca sonca, kali ty zastajeśsia adzin u biadzie. Svaju versiju jany pryśviacili paciarpiełym ad Čarnobylu". Siarod inšych hitoŭ hodu nazyvajucca "Brudnaja vada" ad "Tavaryša Maŭzera", "Vyjście" ad "IQ-48" - hrupy, jakaja za hod uvajšła ŭ pieršyja šerahi biełaruskaha roku, - niekalki piesień Źmitra Vajciuškieviča z albomaŭ "Paravoz kachańnia", "Miesiac i sonca" i "MW".

TOR-5 alternatyŭnych piesień hodu:

1. "Zet" - "Biełakryły anioł".

2. "Tavaryš Maŭzer" - "Brudnaja vada".

3. "IQ-48" i Pamidoraŭ - "Vyjście".

4. "Partyzone" i Rusia - "Majo serca".

5. "TT-34" - "Bum!".

Pop-pieśnia hodu

Zakanadaŭcami mody aficyjnaha biełaruskaha popsu sioleta byli chłopcy z hurtu "Tiani-Tołkaj", jakija ŭ rekordna karotki čas z pankaŭ pieratvarylisia ŭ "prostych ruskich parniej". Hety hurt byŭ adznačany Hran-pry na muzyčnaj cyrymonii "Telepartacyja-2005", a dysk "3000 šahov. Bałłady" zajmaje 3-je miesca pa vynikach prodažu za ŭvieś hod u dyskarniach "Misteryja huku" (napieradzie tolki "Atlantyka" z "Heavenly" i "J-Mors" z "Aprielem").

Muzyka i dy-džej Aleh Chamienka siarod hałoŭnych pop-zdabytkaŭ hodu nazyvaje pieśniu "Kachańnie" ŭ vykanańni siastryčak z "Mary Popins". Hurt składajecca ź dźviuch eks-vakalistak hurtu "Mantana" (asnoŭny vakał - Alesia Bierułava, žonka Siarhieja Michałka). Adzin ź lideraŭ apytańniaŭ - hrupa "J_Mors". Amal kožny z apytanych ekspertaŭ "NN" nazyvaje ichnija pieśni "Tak-cik-tak" ci "Apriel" u piaciorcy najlepšych. "J_Mors" udała praviali hod: vydali dva dyski i abjeździli ŭsiu krainu z turam "Majo sonca". Eksperty "NN" - adzin z aŭtaraŭ knihi "222 albomy biełaruskaha roku i nia tolki…", jakaja vyjdzie naleta, Anatol Mialhuj i viadučy prahramy "Novaja ziamla" na radyjo "Junistar" Viktar Siamaška - sychodziacca na tym, što heta najlepšaja pieśnia hurtu, bo jana nastrajovaja i meladyčnaja.

TOR-5 najlepšych pop-piesień hodu:

1. "Mary Popins" - "Lubov́".

2. "Tiani-Tołkaj" - "3000 šahov".

3. "J_Mors" - "Tak-cik-tak".

4. Alesia - "O hłavnom".

5. Łarysa Hrybalova - "SMS".

Siarhiej Budkin

❏

Padzieja hodu

Padzieja hodu - XV festyval "Rok-koła" ŭ Navapołacku. Śviatkavańnie ŭhodkaŭ pačałosia letaś, kali prajšoŭ adboračny tur, uletku na hałoŭnaj płoščy horadu adbyŭsia śviatočny kancert z udziełam miascovych hurtoŭ i haściej ź Miensku, a kropka była pastaŭlena na pačatku śniežnia - trochdzionnym festam u haradzkim pałacy kultury z udziełam amal 40 kamandaŭ. U miežach "Rok-koła-2005" adbyŭsia adzin ź niešmatlikich sioleta vystupaŭ u Biełarusi hrupy "N.R.M.". Ich novaja pieśnia "Ŭsio roŭna my pieramožam" moža stać hałoŭnym hitom nastupnaha hodu.

Albom hodu

U liderach - "Apriel" ad "J_Mors". Krychu adstajuć dyski Vajciuškieviča, bluzavy "Nothing But Love" ad "Svet Boogie Band", składanka "Premjer-tuzin", dysk z nanoŭ zapisanymi hitami "Kramy" - "Budź razam z nami".

U apytańni "NN" brali ŭdzieł: Kacia Pytleva, viadučaja "Pieršaha muzyčnaha"; Taciana Zamiroŭskaja, muzyčnaja ahladalnica "BiełHaziety"; Anatol Mialhuj, muzyčny krytyk; Vital Supranovič, kiraŭnik "BMA-group", Viktar Siamaška, viadučy na radyjo "Junistar", Łukaš Stepaniuk, muzyčny partał "Zona", radyjo "Eska" (Polšča); Aleh Chamienka, viadučy na radyjo "Miensk", lider hrupy "Pałac"; Źmicier Padbiareski, žurnalist; Mikałaj Sapunoŭ, menedžar katalohu "West Records".

Fota Julii Daraškievič

• 0
• 0
• 0
• 0
• 0
• 0
• 0
• 0