Siońnia abłasny sud ahučyŭ terminy dla fihurantaŭ kryminalnaj spravy ab psavańni 170 ton miasa na Homielskim miasakambinacie. Jany pryjšli ŭ zału pasiedžańniaŭ u zručnaj vopratcy, z sabranymi torbami, pierad pačatkam abviaščeńnia prysudu pacałavali rodnych i blizkich.
Na łavie padsudnych było 10 čałaviek. Siarod ich — były hienieralny dyrektar Homielskaha miasakambinata Ryčard Stefanovič, były namieśnik ministra sielskaj haspadarki Vasil Pivavar, načalniki cechaŭ i inšyja kiraŭniki pradpryjemstva, vieturačy kambinata i horada, pradstaŭniki vietnahladu. Jany abvinavačvajucca ŭ złoŭžyvańni ŭładaj abo słužbovymi paŭnamoctvami, a taksama słužbovaj chałatnaści.
Sud prysudziŭ eks-dyrektara Stefanoviča da 6 hadoŭ pazbaŭleńnia voli i štrafu i adnu tysiačy bazavych vieličyń (24500 rubloŭ) štrafu.
Byłomu namministra sielskaj haspadarki Vasilu Pivavaru pryznačyli pakarańnie ŭ vyhladzie 2 hadoŭ pazbaŭleńnia voli ŭ kałonii ŭzmocnienaha režymu biez kanfiskacyi majomaści. Namieśniku dyrektara pa vytvorčaści miasakambinata Alaksandru Bandarenku hałoŭnamu vieturaču miasakambinata Iharu Siamionavu dali pa 5 hadoŭ hadoŭ pazbaŭleńnia voli i 750 bazavych vieličyń (18375 rubloŭ) štrafu kožnamu.
Načalnika Homielskaj haradskoj vietstancyi Viktara Vałčankova, supracoŭnika vietnahladu Vasila Kraŭcova, byłoha namieśnika dyrektara vietnahladu, kiraŭnika kamisii, nakiravanaj ŭ Homiel dla manitorynhu zachoŭvańnia pradukcyi Alaksandra Bukina prysudzili da 2 hadoŭ pazbaŭleńnia voli i 500 bazavych vieličyń (12250 rubloŭ) štrafu.
Načalniku ŭpraŭleńnia vieterynarnaha kantrolu kamiteta pa sielskaj haspadarcy i charčavańni Homielskaha abłvykankama Ale Łazoŭskaj dali 1 hod 6 miesiacaŭ pazbaŭleńnia voli i 300 bazavych vieličyń (7350 rubloŭ) štrafu.
Vieturača Homielskaha miasakambinata Arsienija Skvarčeŭskaha prysudzili da dvuch hadoŭ kałonii-pasialeńnia. Načalniku chaładzilnaha cecha Iharu Mielnikavu dali 3 hady kałonii ahulnaha režymu, praŭda, z adterminoŭkaj na dva hady, i 500 bazavych vieličyń (12250 rubloŭ) štrafu. Mielnikaŭ, na dumku dziaržabvinavačańnia, vykazaŭ čystasardečnaje raskajańnie, uśviadomiŭ złačynnaść svaich dziejańniaŭ, davaŭ paśladoŭnyja pakazańni jak na papiarednim śledztvie, tak i ŭ sudzie, pryniaŭ miery pa kampiensacyi ŭronu.
Usie abvinavačanyja salidarna pavinny vypłacić 681 tys. rubloŭ u košt pakryćcio škody miasakambinatu.
Ciapier čytajuć
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary