Syn biełaruskamoŭnaha piśmieńnika, kaliści byŭ pres-sakratarom Łukašenki. Piać faktaŭ pra novaha ministra infarmacyi
Hałoŭny redaktar prezidenckaj haziety «SB» Dźmitryj Žuk pajšoŭ na pavyšeńnie, pravaliŭšy papiaredniuju pracu.
Surazmoŭcy «Našaj Nivy» ličać, što pryznačeńnie Žuka — heta nie nadzieja Łukašenki na raźvićcio miedyjaśfiery na čale ź niejkim patencyjnym refarmataram, a banalnaja patreba zakryć vakansiju, jakaja ŭtvaryłasia paśla pierachodu ambitnaha Marata Markava ŭ susiedniaje Ministerstva kultury.
Ministerstva infarmacyi — adno z samych drobnych ministerstvaŭ pa kolkaści supracoŭnikaŭ, kali nie samaje drobnaje. Žuk budzie adkazvać za dziaržaŭnyja haziety, vydaviectvy, drukarni, pryhladać za niedziaržaŭnymi miedyja, jakija zastalisia ŭ krainie.
Naradziŭsia ŭ siamji biełaruskamoŭnaha piśmieńnika, ale biełaruskaj movaj pahardžaje
55‑hadovy prapahandyst pachodzić ź vioski Letkaŭščyna Słuckaha rajona Minskaj vobłaści — heta małaja radzima jaho baćki, viadomaha piśmieńnika Alesia Žuka. Toj skončyŭ fiłfak BDU i adpracavaŭ u proćmie vydaviectvaŭ i časopisaŭ.
Aleś Žuk pisaŭ svaje tvory pa-biełarusku, a taksama pierakładaŭ na rodnuju movu ruskuju kłasiku. Admietna, što Žuk-starejšy byŭ členam niedziaržaŭnaha Sajuza biełaruskich piśmieńnikaŭ.
Aleś Žuk pamior u 2022 hodzie.
Žuk-małodšy pajšoŭ pa śladach baćki, taksama skončyŭ fiłałahičny fakultet BDU — vyvučyŭsia na nastaŭnika biełaruskaj movy. Paśla ŭniviersiteta adpracavaŭ dva hady pa śpiecyjalnaści ŭ minskaj škole-himnazii №199, a potym pajšoŭ u bolš chlebnaje miesca.
Spačatku atrymałasia znajści jakoje-nijakoje miesca ŭ vydavieckim centry Nacbanka, a potym trapiŭ u biełaruskuju redakcyju rasijskaha infarmacyjnaha ahienctva «Interfaks». Pry hetym ź biełaruskaj movaj Dźmitryj Žuk zaviazaŭ — jon nikoli nie vykarystoŭvaje jaje ni ŭ svaich artykułach, ni ŭ efirach, navat kali nasuprać siadzić biełaruskamoŭny surazmoŭca.
Vyvieŭ BiełTA ŭ lidary
U svoj čas Dźmitryj Žuk uznačalvaŭ pres-słužbu Alaksandra Łukašenki — z 1999 da 2003 hoda. Tady heta pasada była bolš techničnaj, Žuk nie mieŭ takich palityčnych paŭnamoctvaŭ, jak ciapier u Natalli Ejsmant.
U 2003 hodzie Žuka pryznačyli dyrektaram BiełTA. Jon źmianiŭ na pasadzie rasijanina Aleha Pralaskoŭskaha, jaki pajšoŭ u namieśniki kiraŭnika Administracyi Łukašenki, a paśla byŭ i ministram infarmacyi. Ich žyćciovyja šlachi čymści padobnyja — kali trapiŭ u prapahandysckuju abojmu, to nie hledziačy ni na što zastaješsia ŭ joj, choć i pieraskokvaješ z pasady na pasadu.
Varta pryznać, što mienavita ŭ časy Žuka BiełTA vybiłasia na piarednija roli siarod dziaržaŭnych prapahandysckich miedyja. Raniej isnavała absurdnaja zaviadzionka, što apieratyŭnuju infarmacyju ad biełaruskich dziaržaŭnych orhanaŭ spačatku publikavaŭ rasijski «Interfaks», a tolki paśla jaje padchoplivali miascovyja miedyja.
Pravaliŭsia ŭ SB
U 2018 hodzie Žuka pastavili hałoŭnym redaktaram «Sovietskoj Biełoruśsii», čyjho niaźmiennaha kiraŭnika Paŭła Jakuboviča faktyčna adpravili na piensiju.
Ci ŭdałosia novamu načalniku raźvić vydańnie? Ahułam — nie.
Padrabiaznyja finansavyja spravazdačy chołdynha nie publikujucca, ale ŭ hetym płanie situacyja, chutčej za ŭsio, vyhladaje bolš-mienš pryvabna. Dziakujučy prymusovaj padpiscy i vymušanaha sponsarstva z boku pryvatnaha biznesu, jakomu davodzicca raźmiaščać rekłamu ŭ dziaržaŭnych miedyja, «SB» nasamreč trymajecca na płyvie.
Zrazumieła, što nakład upaŭ, ale ŭ hetym ničoha dziŭnaha — papiarovyja haziety ŭ kryzisie va ŭsim śviecie. Kali Žuk prymaŭ «SB», to ŭ štodzionnaha numaru drukavałasia kala 200 tysiač asobnikaŭ, ciapier — kala 130 tysiač. Znoŭ-taki — u rynkavaj situacyi, biez administratyŭnaha resursu, ličby apuścilisia b jašče ŭ razy.
Sproby raźvivać inšyja haziety chołdynha pravalilisia ŭščent. «Respublika» nie stała Financial Times niahledziačy na ŭkładzienyja hrošy, «Znamia junosti» tak i nie dahrukałasia da moładzi.
U internecie chvalicca taksama niama čym — prahlady SB nižejšyja, čym u zabłakavanych u Biełarusi «zabaronienych» niezaležnych miedyjaŭ.
Ci viadzie rej «SB» u vyznačeńni paradku dnia krainy? Taksama nie. Usie samyja važnyja ekskluzivy Natalla Ejsmant pakidaje ŭ svaim «Pule pieršaha», źlivy siłavikoŭ tranślujuć u prajm-tajm pa telekanałach. A «SB» zastajecca tolki pierakazvać ubačanaje.
Za Žukom hradus nianaviści na staronkach haziety vidavočna vyras, svabodu dziejańnia atrymali marhinalnyja aŭtary, nabranyja ŭ svoj čas Jakubovičam. Adnak na hrafamaniju Andreja Mukavozčyka ci Ludmiły Hładkaj užo mała chto źviartaje ŭvahu, jany taksama prajhrali svaim kaleham z teleprapahandy.
Pad sankcyjami Jeŭrasajuza
Novy ministr infarmacyi razam ź inšymi prapahandystami i siłavikami trapiŭ pad sankcyi Jeŭrasajuza za svaju dziejnaść.
«Hetyja prapahandysty śviadoma pradstaŭlajuć biełaruskamu hramadstvu łžyvuju infarmacyju pra represii, jakija pravodziać dziaržaŭnyja struktury, raspaŭsiudžvajuć dezynfarmacyju jak ad biełaruskich, tak i ad rasijskich uładaŭ, i raspalvajuć varožaść u dačynieńni da demakratyčnaj apazicyi i hramadzianskaj supolnaści», — abhruntoŭvalisia sankcyi suprać takich, jak Dźmitryj Žuk.
Svaje razvahi pra situacyju ŭ Biełarusi i ŭ śviecie Žuk i jaho kalehi štotydzień ahučvajuć u presavym «Kłubie redaktaraŭ» — adnoj z samych małarejtynhavych prahram biełaruskaha telebačańnia. Adzinaja jaho karyść — lehalnaja mahčymaść vypłačvać bonusy da zarobku ŭdzielnikam havarylni.
«Kali vy pačuli słovy «pravy čałavieka», paśla jakich iduć niejkija apoviedy pra vašu radzimu Biełaruś, viedajcie: hety čałaviek — vorah našaj krainy. Našy prychilniki hetych terminaŭ paźbiahajuć», — zajaŭlaŭ jon u efiry ŭ 2023 hodzie. A demakratyja i svaboda słova, maŭlaŭ, heta tyja miechanizmy, z dapamohaj jakich Zachad razburaje dziaržaŭnaść inšych krain.
Kali pastavić hety efir zaraz, u 2026 hodzie, nichto nie zaŭvažyć roźnicy. Žuk havoryć prykładna adnyja i tyja ž prapahandysckija banalnaści štotydzień.
Prapahandyst ličycca namieśnikam staršyni pastajannaj kamisii Savieta Respubliki pa mižnarodnych spravach i nacyjanalnaj biaśpiecy. Taksama ŭstupiŭ u łukašenkaŭskuju partyju «Biełaja Ruś».
Synoŭ uziaŭ na pracu ŭ BiełTA
Da doma ŭ Drazdach Žuk, vyhladaje, nie daros. Zhodna z danymi BelPol, siamja Žukoŭ vałodaje niekalkimi kvaterami ŭ stalicy — adna ź ich, niedaloka ad stancyi mietro Kavalskaja Słabada, zarehistravanaja na samoha Žuka. Jašče adna kvatera, u Malinaŭcy, naležyć jahonaj žoncy.
U pary naradziłasia dvoje synoŭ. Što cikava, abodva ŭ svoj čas trapili na pracu ŭ baćkavu BiełTA.
Viadoma, što starejšy syn paśla apynuŭsia ŭ IT-kampanii EPAM, zasnavanaj Arkadziem Dobkinym, jaki paśla vybaraŭ 2020 hoda razam ź inšymi kiraŭnikami biełaruskich technałahičnych kampanij padpisaŭ adkryty list z zaklikam da vyzvaleńnia palityčnych viaźniaŭ i praviadzieńnia novych vybaraŭ. U 2021 hodzie Łukašenka hałasłoŭna abvinavaciŭ Dobkina i supracoŭnikaŭ EPAM u finansavańni pratestaŭ.
Kamientary