Kiraŭnik niezarehistravanaha Biełaruskaha nacyjanalnaha kanhresu, eks-palitviazień Mikałaj Statkievič vystupiŭ z zajavaj pa vynikach sioletnich Dnia Voli i Čarnobylskaha Šlachu.
Statkievič ličyć, što ŭłady da apošniaha razhladali varyjant z praviadzieńniem refierendumu i navat nie admaŭlajucca ad hetaj idei i ciapier, prosta «pieranieśli na bolš daloki termin».
«Kab nie dapuścić kansalidacyi pratestnaj bolšaści suprać «refierendumu», byli zabłakavany niezaležnyja ad režyma sajty, jak «Chartyja». Pieraśledujucca žurnalisty «Biełsata». Źmieny ŭ zakon ab ŚMI zaklikany ŭziać pad kantrol publikacyi i dyskusii na forumach i ŭ sacyjalnych sietkach. Raniej niejaŭnaja zaležnaść častki niedziaržaŭnych ŚMI ad ułady, jak pakazaŭ ich udzieł u kampanii dyskredytacyi prychilnikaŭ šeścia na Dzień Voli, zrabiłasia vidavočnaj», — ličyć palityk. Kankretnyja ŚMI jon nie nazyvaje.
«Kab niejtralizavać nacyjanalna śviadomy słoj, ułady pašyryli dazvolenaje jamu hramadskaje pole — dziejnaść pa adradžeńni movy, etnahrafičnaj simvoliki i historyi BNR, bolš nie pieraśledujecca. Hramadstvu prezientavany novyja «antypratestnyja» hramadskija lidary», — mabyć, havorka pra arhanizataraŭ Dnia Voli, ale znoŭ biez kankretyki.
«Jubilej BNR i «Čarnobylski Šlach» pakazali, što kiraŭnictva demakratyčnych partyj, jakija nie ŭvajšli ŭ BNK, pajšło na ŭmovy režymu, admoviłasia ad pratestnych dziejańniaŭ, naŭprostavaj krytyki dyktatara i navat jaho płanaŭ na «refierendum». Takaja palityčnaja «samakastracyja» viadzie da zachavańnia dyktatury i nie dazvalaje ličyć hetyja partyi sapraŭdnaj palityčnaj apazicyjaj», — heta žorstka Statkievič prachodzicca pa apazicyjnych partyjach.
«BNK akazaŭsia adzinaj realnaj apazicyjaj režymu i centram kansalidacyi pratestnaj bolšaści. My musim kanstatavać, što naša abjadnańnie ź imitacyjnaj apazicyjaj, kiraŭnictva jakoj znachodzicca pad niehałosnym upłyvam ułady, nie budzie dapuščana režymam i tamu niemahčymaje», — kanstatuje Statkievič.
Kamientary