Ustalujcie hety mabilny dadatak — karystajciesia źnižkami ŭ łajalnaha da biełaruščyny biznesu
Svaje.by — katałoh biełaruskamoŭnych biznesaŭ, pasłuh, miescaŭ — stvaryŭ alternatyvu dyskontnym kartkam. «Svaje» abjadnoŭvajuć kampanii, hatovyja dać skidku klijentam, jakija karystajucca hetym katałoham. To bok ludziam, jakim važna, kab biełaruski biznes razmaŭlaŭ ź imi pa-biełarusku.
Jak heta pracuje
Kali ŭ vas Android, to vy prosta ściahvajecie i ŭstaloŭvajecie mabilny dadatak «Svaje», uvachodzicie ŭ akaŭnt (možna praz sacsietki), klikajecie na ikonku padarunka i pa QR-kodu, što źjavicca na ekranie, atrymlivajecie źnižku.
Kali ž u vas iPhone, to pakul nie varta šukać mabilny dadatak u App Store — jon u raspracoŭcy. Prosta zajdzicie na sajt Svaje.by praz Safari ci inšy braŭzer, uvajdzicie ŭ akaŭnt i pakažycie QR-kod naŭprost z sajta.
Pamier źnižki zaležyć ad kankretnaha miesca. Zaznačym, što źnižka ad «Svaich» nie plusujecca da inšych. Heta značyć, što kali ŭ vas užo jość źnižka 5% u miescy, jakoje daje 10% dla karystalnikaŭ «Svaje», to vam źniziać canu na 10%, a nie na 15%.
Dzie možna atrymać źnižku ŭžo siońnia
Minsk:
Symbal.by — rečy i suvieniry, pryśviečanyja biełaruskaj movie, historyi, kultury, tradycyjam i simvałam (10%)
Krama «Imbryk»: aŭdyjoknihi, videa, litaratura, muzyka — pa-biełarusku (15-25%)
Quvalda — hulniavaja prastora i kvesty ŭ samym centry Minska (10%)
Moj modny kut — krama z nacyjanalnym kałarytam (10%)
Darečy — krama adzieńnia i suvieniraŭ u nacyjanalnym styli (15%)
Rahna — biełaruskija suvieniry, padarunki, ramiostvy (5%)
Knihier — kniharnia mastackaj i histaryčnaj litaratury (5%)
Babrujsk:
1387 — tajm-kłub (10%)
Baranavičy:
Roskvit — adzieńnie i suvieniry ź biełaruskim kałarytam (5%)
Brest:
«Kniaź Vitaŭt» — krama adzieńnia i suvieniraŭ u nacyjanalnym styli (10%)
Viciebsk:
«Kniaź Vitaŭt» — krama adzieńnia i suvieniraŭ u nacyjanalnym styli (10%)
Mahiloŭ:
«Šparki Łoś» — chatka smačnaj ježy (15%)
Śpis budzie ŭvieś čas pašyracca, za abnaŭleńniami možna sačyć voś tut. Nie ŭsie kampanii katałoha hatovyja rabić źnižku. Čym bolš drobny biznes, tym składaniej jamu dać bonusy. Niekatoryja biznesy pryncypova nie robiać anijakich źnižak, bo i biez taho prapanoŭvajuć najlepšuju canu.
Ci treba pry hetym razmaŭlać pa-biełarusku
Nie abaviazkova, ale heta budzie naturalna, čakana i pryhoža. Kali viedajecie biełaruskuju movu słaba, to źviartajciesia da załatoj parady — łupicie na trasiancy! Sprava ŭ tym, što ŭsie miescy, zaniesienyja ŭ katałoh «Svaje», pryjazna staviacca da biełaruskaj movy i pazityŭna ŭsprymuć vaša pamknieńnie da biełaruščyny.
Kali ž raptam zdaryłasia tak, što niedzie vam admovili ŭ źnižcy dla «Svaich», to dajcie pra heta viedać administrataram katałoha.
Mesedž dla biznesu
Kali vy chočacie dałučyć kampaniju da hetaj prahramy źnižak, źviarniciesia da administrataraŭ katałohu.
«Svaje» hatovyja prapanavać placoŭku dla stvareńnia kampanijami ŭłasnych prahram łajalnaści. Darečy, płatforma dazvalaje rabić nakaplalnyja źnižki (naprykład, 10% pry sumie zakupaŭ ad 100 rubloŭ).
Nie prablema zrabić, kab pracavali ŭvohule tolki nakaplalnyja źnižki, a źnižka dla «Svaich» była 0%. Ale lepš, viadoma, nie skupicca i «Svaim» adrazu dać choć paru adsotkaŭ!
U dadatak, tut i tak jość aŭtamatyčnaja ekanomija hrošaj na druku płastykavych kartak (a heta minimum $500 pa sučasnych minskich koštach pry nakładzie ad 1000 kartak).
Kamientary