Hanna Sieviaryniec raspaviała, čamu baicca iści ŭ škołu

Voś užo jaki hod na apošnich tydniach žniŭnia ja chvareju — bieź vidavočnych pryčyn, niezrazumieła čamu. Zusim jak tyja małodšyja školniki, što marać zachvareć, kab nie chadzić u škołu. Tak, ja bajusia tudy iści — apošnija niekalki hod, piša Hanna Sieviaryniec u svaim błohu na sajcie Radyjo Svaboda.

Ja nie bajusia dziaciej, nie bajusia ŭrokaŭ, nie bajusia pisać plany i praviarać sšytki, nie bajusia rana ŭstavać, nie bajusia vazić dziaciej pa muzejach i teatrach, ja bajusia zusim inšaha.

Naprykład, ja hvałt jak bajusia zapaŭniać žurnał.

U minułym hodzie mianie trojčy depremiravali za žurnały.

To ja pabłytaju daty, to zapišu sapraŭdnuju temu ŭroka, a nie pa prahramie, to skaraču «KD» zamiest «kantrolny dyktant» ci «SPP» zamiest «słožnopodčiniennoje priedłožienije», i pryjdzie pravierka i ažno padskača: «A što heta Sieviaryniec sabie dazvalaje?! Jana ž nia pieršy hod pracuje, što heta za SPP? Treba skaračać jak «słožn. podč. priedł».!

I ja ž starajusia: zastajusia navat paśla ŭrokaŭ, kab pryhožańka, jak śled, pazapisvać svaje žurnały, ale ž nie. To adznaki za dyktoŭki pastaŭlu ŭ susiedniuju kalonku zamiest rodnaj, to za vierš na pamiać u adnu datu zamiest roznych (mnie tak zručna, ja tady baču, chto vučyŭ, a chto jašče nie, ale nielha — u adnu, bo pravierka tady pytajecca: «Vy što, uvieś urok słuchali vieršy?! Heta taki ŭ vas byŭ urok?!»

«Zapaŭnieńnie žurnałaŭ — heta vaš funkcyjanał, — kažuć mnie. — Kali vy nie ŭmiejecie zapaŭniać žurnał, vy prafnieprydatnaja. Voś ja nie ŭmieju siekčy drovy — dyk ja ž nie idu ŭ lesaruby. A vy čamuści, nie ŭmiejučy zapaŭniać žurnał, u nastaŭniki pajšli»

Jašče ja bajusia pravierak. Usich — i ŭnutranych, i źniešnich. Mnie jość čaho bajacca: akramia niapravilnych žurnałaŭ, maju jašče adzin hrech: niapravilnyja sšytki.

Ja tam pišu dzieciam vialikija adkazy i pytańni, maluju smajliki i staŭlu kličniki i pytalniki, dazvalaju im pisać roznymi čarniłami i zavodzić sšytki lubych koleraŭ. Kali dzieci pytajucca ŭ mianie: «A jak padpisvać, źleva, sprava ci pa centry?» — ja im kažu: «Dy dzie pažadajecie».

Ja nia toje kab chacieła spračacca z pravierkami, kryj boža. Ja prosta nie mahu znajści ŭ sabie ŭnutranaj siły patrabavać ad dziaciej padpisvać sšytki ź niejkaha zahadzia vyznačanaha boku. A jašče ja staŭlu adznaki źleva, a pamyłki padličvaju sprava. Mechanična. A treba naadvarot.

Bajusia kiravać navukovym abjadnańniem vučniaŭ.

Toje, što ja rablu jak jahony kiraŭnik — zdabyvaju archiŭnyja materyjały, prydumvaju temy, zaprašaju haściej, važu dziaciej tudy i siudy — heta ja rablu tak, ad siabie, pa pryvatnaj inicyjatyvie, ja mahu hetaha i nie rabić, ale ja abaviazkova pavinna skłaści plan pracy abjadnańnia pa adzinym dla ŭsich šablonie i napisać pratakoły pasiedžańniaŭ. Ja pišu za hod nieźličonuju kolkaść tekstaŭ — i ja nie mahu biez unutranaj baraćby napisać čatyry pratakoły «ni pra što».

I što samaje kryŭdnaje — ja nijak nie mahu nikomu patłumačyć, što voś hetaje voś usio — i jość taja pryčyna, jakaja zabivaje ŭ nastaŭniku kreatyŭ i tvorčaść.

Ludzi, jakija praviarajuć źniešni bok nastaŭnickaj dziejnaści, usie hetyja žurnały i sšytki — jany niebłahija ludzi, prafesijanały svajoj pravieračnaj spravy. Jany sapraŭdy nie razumiejuć, što tut takoha składanaha — zapisać žurnał pa prahramie, zavieści ŭsim adnolkavyja sšytki i padpisać ich pa levym baku (ci to pa pravym?). Jak heta abmiažoŭvaje tvorčaść i kreatyŭ?

Kamu i jak patłumačyć, što najaŭnaść adzinaha na ŭsiu krainu padručnika — abmiažoŭvaje tvorčaść i kreatyŭ. Najaŭnaść suvorych patrabavańniaŭ da afarmleńnia vučnioŭskich rabot na kanferencyi — abmiažoŭvaje tvorčaść i kreatyŭ. Prymusovy ŭdzieł u bieźličy konkursaŭ, jakija spuskajucca nam ź Minadu praz adździeł adukacyi — abmiažoŭvaje tvorčaść i kreatyŭ. Depremiravańnie — tym bolš abmiažoŭvaje i ničoha nie vyrašaje.

Ale vybar taki: albo ty atrymlivaješ prava iści ŭ klasu da dziaciej, i razam z hetym pravam — viaryhi systemy, albo ty prosta zvalniajeśsia — i stanoviśsia volnym ad viaryhaŭ. I ad lubimaj pracy adpaviedna.

Tamu da 1 vieraśnia ja, kaniešnie, akryjaju.

• 0
• 0
• 0
• 0
• 0
• 0
• 0
• 0