Ahučyli prysudy za dziaduchu kamandziru roty i praparščyku z častki Koržyča

U piatnicu, 19 kastryčnika, Minski abłasny sud vynies abvinavaŭčy prysud kamandziru roty Paŭłu Sukavienku i praparščyku Arturu Virbału. Ich pryznali vinavatymi pa č. 1, č. 2 art. 455 KK (Złoŭžyvańnie ŭładaj, pieravyšeńnie ŭłady albo biaździejnaść ułady).

— Prašu sud pryznačyć mnie pakarańnie, nie źviazanaje z pazbaŭleńniem voli. U dalejšym płanuju pracaŭładkavacca, kab prynosić karyść svajoj siamji i hramadstvu, — kazaŭ padčas apošniaha słova abvinavačany Artur Virbał.

Advakat Alaksandr Halijeŭ, jaki ŭ hetym pracesie pradstaŭlaŭ intaresy kamandzira roty Paŭła Sukavienki, prasiŭ sud uličyć usie akaličnaści i taksama nie pazbaŭlać voli svajho padabaronnaha.

U vyniku Minski abłasny sud prysudziŭ kamandzira roty Paŭła Sukavienku da 6 hadoŭ pazbaŭleńnia voli ŭ kałonii ŭzmocnienaha režymu, praparščyka Artura Virbała - da 4 hadoŭ. Jany buduć pazbaŭlenyja voinskich zvańniaŭ.

Sukavienka, pačuŭšy prysud, zapluščyŭ vočy. Pa vyrazie tvaru Virbała było zrazumieła, što jon nie čakaŭ takoha surovaha pakarańnia. Jon ciažka ŭzdychnuŭ i niešta cicha skazaŭ.

Na abviaščeńnie prysudu pryjšli vajskoŭcy ŭ formie, a voś paciarpiełych nie było.

Advakat Sukavienki Alaksandr Halijeŭ zajaviŭ: «Vysokaja imaviernaść, što my budziem abskardžvać prysud».

Razhlad spravy pa niestatutnych adnosinach u Piečach pačaŭsia 1 kastryčnika, hetaja kryminalnaja sprava źjaviłasia paśla hibieli Alaksandra Koržyča, ale da śmierci radavoha, pavodle viersii śledstva, nie maje dačynieńnia.

Siarod 7 paciarpiełych — siaržanty Jaŭhien Baranoŭski, Jahor Skuratovič i Anton Viaževič. U zału ŭ kajdankach ich dastaŭlali kanvairy. Maładych ludziej užo treci miesiac sudziać za hrašovyja pabory i źbićcio sałdat, u tym liku i Alaksandra Koržyča. Darečy, sami paciarpiełyja siabie takimi nie ličać i prasili sud nie karać stroha abvinavačanych.

Pa viersii śledstva, Pavieł Sukavienka prysvoiŭ sabie 64 rubli 29 kapiejek, jakija naležali inšym vajskoŭcam. Patrabavaŭ u padnačalenych raspuščalnuju kavu i sasiski ŭ cieście. A taksama ŭžyvaŭ da sałdat fizičnuju siłu: biŭ draŭlanaj pałkaj. Artura Virbała abvinavacili ŭ tym, što jon prymušaŭ vajskoŭcaŭ adciskacca, a taksama ŭžyvaŭ fizičnuju siłu.

— Kali paciarpiełyja kažuć, što biŭ ich, značyć, tak i było. U mianie niama pryčyn im nie daviarać. Kali sud vyrašyć, što biŭ, pahadžusia, — kazaŭ padčas pracesu Virbał. - U armii jak? Kali stavicca zadača, jaje treba vykonvać. A sałdaty nie reahavali, sychodzili ŭ bok, adpaviedna, ja pačynaŭ pavyšać hołas, kazaŭ pryniać upor ležačy. Heta było nie prynižeńnie, a momant ich ŭzbadzioryć. Tak, treba było zrabić vymovu, adpravić u narad, nu, a ja čałaviek prosty. Mnie było ich pa-čałaviečy škada. Ciapier razumieju, što pastupaŭ niapravilna.

• 0
• 0
• 0
• 0
• 0
• 0
• 0
• 0