U Mahiloŭskaj abłasnoj biblijatecy patłumačyli, čamu admovilisia ad biaspłatnaha piacitomnika Śviatłany Aleksijevič
Dyrektar Mahiloŭskaj abłasnoj biblijateki adreahavała na zajavu siabroŭ Biełaruskaj asacyjacyi žurnalistaŭ, jakija zaklikali pryniać u padarunak piacitomnik «Hałasy utopii» Aleksijevič na biełaruskaj movie.
Hrošy na knihi piśmieńnicy źbirali pa ŭsioj krainie pry dapamozie kraŭdfandynha — usiaho 110 tysiač dalaraŭ na 15 tysiač asobnikaŭ. Najbolšy ŭniosak daŭ «Biełhazprombank». Usie knihi płanavałasia biaspłatna pieradać u biblijateki krainy. Adnak u Mahiloŭskaj vobłaści ad padarunka admovilisia.
Siabry Biełaruskaj asacyjacyi žurnalistaŭ Mahiloŭskaha rehijonu, aburanyja takimi adnosinami da tvoraŭ Aleksijevič, padrychtavali śpiecyjalnuju zajavu. U im jany zapatrabavali nazvać tych, chto admoviŭsia prymać knihi ŭ dar, paviedamić, čym arhumientavanaja takaja admova i što zrabić, kab knihi Aleksijevič ŭsio ž taki dabralisia da palic biblijateki.
U adkaz dyrektar Mahiloŭskaj abłasnoj biblijateki imia Lenina Iłona Sarokina paviedamiła, što ŭ jaje ŭstanovie luby žadajučy moža aznajomicca z knihami Śviatłany Aleksijevič. Novy piacitomnik, śćviardžaje Sarokina, u ich užo jość.
— Pakolki elektronny fond biblijateki źmiaščaje ŭsie najaŭnyja tvory aŭtara, luby karystalnik moža znajści danyja i pra novaje vydańnie — «Hałasy utopii», vydadzienyja ŭ 2018 hodzie, — zajaviła dyrektar.
Na sajcie biblijateki sapraŭdy jość infarmacyja pra najaŭnaść «Času sekand-chend», «Čarnobylskaj malitvy», «Cynkavych chłopčykaŭ», «Apošnich śviedak» i «U vajny nie žanočy tvar», jakija ŭvachodziać u piacitomnik «Hałasy utopii».
Jak zapeŭniła Iłona Sarokina, u naviedvalnikaŭ nie budzie prablem z atrymańniem hetych knih.
Kamientary