U Słucku 77-hadovaja babula pryjšła pa piensiju, a joj skazali, što jana pamierła. I tak było dva razy
77-hadovaja žycharka vioski Amhovičy pryjechała ŭ bank, što znachodzicca ŭ Słucku, kab atrymać piensiju sa svajho rachunku. A apieratar banka paviedamiła joj, što «rachunak zabłakavany z pryčyny śmierci ŭkładčyka» — heta značyć jaje.
Śviatłana Alaksiejeŭna (imia źmienienaje — Red.) ź ciažkaściu apamiatałasia i stała tłumačyć, što raniej pamior jaje muž. A sama jana, voś, žyvaja. Pakazała i svoj pašpart. Jana patłumačyła supracoŭniku banka, što paśla śmierci muža była ŭ nataryusa pa spravach spadčyny. Supracoŭniki banka railisia i piensiju žančynie vydali. Heta zdaryłasia ŭ śniežni.
Učora, 28 studzienia, piensijanierka sa svajoj svajačkaj znoŭ pryjechała ŭ bank, ale kali chacieła atrymać hrošy sa svajho ŭkładu, joj znoŭ admovili. Supracoŭnica banka skazała: «Rachunak zabłakavany pa pryčynie śmierci ŭkładčyka» i sama ździviłasia: jak takoje moža być? Staić žyvy čałaviek, a rachunki zabłakavanyja pa pryčynie śmierci.
Žančyna pieražyła šok. Supracoŭniki banka nie vydali hrošy, niahledziačy na toje, što bačyli svaju klijentku žyvoj, i jana padała ŭsie nieabchodnyja dakumienty. Śviatłana Alaksiejeŭna skazała supracoŭnicy banka, što miesiac tamu ŭžo była padobnaja situacyja, i tady hrošy ŭsio ž jana atrymała.
Naviedvalnic prasili pačakać. Pa słovach svajački, babula adčuła siabie drenna: padniaŭsia cisk i baleła hałava. Žančyny sprabavali atrymać tłumačeńnie ad pradstaŭnikoŭ banka i daviedacca, jak stała mahčymaj takaja situacyja i chto ŭ hetym vinavaty.
Adnaznačnaha adkazu jany tak i nie atrymali, a pačuli zdahadku, što paśla zapytu nataryusa supracoŭniki banka, imavierna, vyrašyli, što pamior nie tolki muž, ale i žonka. Piensijanierka ździŭlajecca, kali rachunak zabłakavany z pryčyny śmierci ŭkładčyka, to jak bank praciahvaŭ niekalki miesiacaŭ zaličvać na jaho piensiju.
Razbor praciahvaŭsia dźvie hadziny. Paśla čaho piensijaniercy vydali ŭkład i paprasili prabačeńnia. Pa słovach niaviestki Śviatłany Alaksiejeŭny, dobra, što hetaja situacyja skončyłasia paśpiachova, choć babula pieražyła mocny stres.
Kamientary