Adna na 15 miljonaŭ ciažarnaściej. U Aŭstralii naradzilisia redkija adnajajcavyja čaćviarniaty

14 lipienia, na 28‑m tydni i čaćviortym dni ciažarnaści, z dapamohaj kiesarava siačeńnia na śviet źjavilisia čatyry dziaŭčynki. Jany źjaŭlajucca manazihotnymi čaćviarniatami — heta značyć, što raźvilisia z adnoj apłodnienaj jajcakletki, jakaja padzialiłasia na čatyry embryjony.

U balnicy paviedamili, što dla 34‑hadovaj Dženitar Naamoany i jaje muža Džortama, jakija ŭžo vychoŭvali čaćviarych dziaciej, navina pra toje, što jany čakajuć čaćviarniat, stała «vielizarnaj niečakanaściu».

Doktar Aleksa Biendał, jakaja nazirała ciažarnaść z samaha pačatku, adznačyła, što adna-jajcavyja čaćviarniaty sustrakajucca prykładna ŭ adnoj z 15 miljonaŭ ciažarnaściej. Pavodle jaje słoŭ, toje, što ŭsie čatyry płady mieli ahulnuju płacentu, źjaŭlajecca biesprecedentnym vypadkam.

Akušer-hiniekołah Biendał rastłumačyła, što takaja ciažarnaść źviazana ź vielmi vysokimi ryzykami. Na 25‑m tydni žančynu špitalizavali, kab pastajanna nazirać za jaje stanam.

«My zaŭsiody kazali, što kali nam udasca praciahnuć ciažarnaść da 28 tydniaŭ, heta ŭžo budzie vialikim pośpiecham», — skazała doktarka.

«Tamu naradžeńnie čatyroch cudoŭnych i zdarovych dziaŭčynak na 28‑m tydni — heta nievierahodna. My vielmi rady, što stali častkaj hetaj historyi», — dadała jana.

Pavialičyć

«Dženitar z samaha pieršaha dnia mužna pieraadolvała ŭsie vyprabavańni… Joj cudam udałosia paźbiehnuć usich uskładnieńniaŭ i ryzyk — jak dla siabie, tak i dla svaich dziaciej», — adznačyła Biendał.

Novanarodžanych dziaŭčynak nazvali Emili, Charyjet, Ketryn, a taksama Aleksa — u honar doktara Aleksy Biendał. Jana nazvała heta vialikim honaram.

Dziaŭčynki buduć znachodzicca ŭ adździaleńni intensiŭnaj terapii dla novanarodžanych, pakul nie dasiahnuć terminu danošanaj ciažarnaści. Pavodle słoŭ Biendał, ciapier jany «adčuvajuć siabie nadzvyčaj dobra».

Inšym dzieciam siamji ad adnaho da dziesiaci hadoŭ. Niadaŭna maci zapuściła anłajn-zbor srodkaŭ, kab nabyć jak minimum dziesiacimiesny aŭtamabil.

Siamji ŭžo ŭdałosia sabrać 37 tysiač aŭstralijskich dalaraŭ (kala 24 tysiač dalaraŭ ZŠA).

«Našy čatyry kaštoŭnyja cudy ščaśliva naradzilisia, i choć našy sercy pierapoŭnieny ŭdziačnaściu, realnaść dohladu adrazu za čatyrma novanarodžanymi pryniesła vykliki, jakich my nikoli nie mahli sabie ŭjavić», — napisała Dženitar na staroncy zboru srodkaŭ.

Čaćviarniaty, začatyja naturalnym šlacham, — nadzvyčaj redkaja źjava. Pavodle acenak miedykaŭ, vierahodnaść takoj ciažarnaści składaje prykładna adzin vypadak na 700 tysiač rodaŭ.

• 4
• 0
• 1
• 0
• 1
• 0
• 0
• 0