Sustrakajem viasnu ŭ poŭnym uzbrajeńni: pakrokavaja fotainstrukcyja dvuch sakavitych makijažaŭ, jakija aśviažać pohlad i ŭvieś vobraz
Viasna ŭžo amal z nami! Užo ciapier niekatoryja asabliva haračyja suajčyńniki skinuli ciažkija puchaviki i čaraviki, u kramach źjavilisia ciulpany, napieradzie majačyć jašče adno hiendarnaje śviata, dy i radyska voś-voś paśpieje. Usio heta radasnaje ažyŭleńnie my vyrašyli adlustravać na tvary z dapamohaj zichatlivaha, krychu lehkadumnaha i vielmi prostaha makijažu, paŭtaryć jaki zmoža navat pačatkoviec!
Varyjant mejku №1
Dla pieršaha varyjantu viasnovaha mejku nam spatrebiacca cieni niekalkich koleraŭ (pa žadańni ad troch da dziesiaci, ja vykarystoŭvała piać), lepš sacinavyja abo šymiernyja, ich praściej rastušavać i atrymać pryhožy pieraliŭ. Z dastupnych u Biełarusi pasprabujcie cieni-adnuški ad Relouis, u ich u sieryjach Pro i Limited edition jość vielmi pryjemnyja adcieńni, i kaštujuć jany niadoraha. Vielmi kłasnyja suchija pradukty robić maładaja kampanija Bernovich, jany aryjentavanyja chutčej na prafiesijanała abo daśviedčanaha amatara i kaštujuć daražej, ale jakaść vydatnaja, a jašče jość paletki-piaciorački Forget-Me-Not z udałym spałučeńniem koleraŭ.
Pieršy krok — rychtujem naš pałatno! Vyrabicie svaje zvyčajnyja ŭvilhatnialny i / abo soncaachoŭny krem (spadziajusia, usie ŭžo viedajuć, što navat u horadzie i navat uzimku krem z SPF patrebny kožny dzień?), a taksama tanalny srodak i kansiler, kali karystajeciesia. Padfarbujcie brovy, zrabicie ŭkładku zvykłym sposabam.
Krok druhi — nanosim na ŭsio ruchomaje pavieka bazu dla cieniaŭ i rastušoŭvajem jaje, lepš za ŭsio palcam. Ni adny suchija cieni, navat luks, nie buduć dobra trymacca biez bazy ceły dzień, asabliva kali ŭ vas navisłaje abo schilnaje da tłustaści pavieka. U jakaści asnovy moža vystupać jak śpiecyjalny pradukt (dobryja jość u Relouis, Nyx i Artdeco), tak i prosta kansiler. Naša zadača — zrabić pavieka źlohku lipkim, kab «prylapić» na jaho cieni. Nie pierabiarycie — tonkaha płasta, paśla rastušoŭki amal prazrystaha, budzie całkam dastatkova.
Krok treci — biarom płoski pendzal (jość mierkavańnie, što dla suchich praduktaŭ lepš vykarystoŭvać pendzal z naturalnaha vorsa, ale heta nie zusim etyčna, tym bolš što sučasnyja sintetyčnyja ź niejłonu i takłonu nikolki nie sastupajuć im u jakaści). Padzialicie pavieka na stolki častak, kolki ŭ vas koleraŭ, i, nabraŭšy na pendzal kryšku cieniaŭ i strosšy / zdźmuŭšy lišniaje, pryciskajučy, pieraniasicie samyja śvietłyja cieni na pieršuju častku.
Paŭtarycie toje ž z druhim koleram, źlohku zachodziačy na miažu pieršaha. Pamiž kolerami pendzal možna čyścić, pracirajučy ab papiarovuju survetku, ale kali vy idziacie ad śvietłaha da ciomnaha i nabirajecie cieniaŭ patrošku, u hetym nie budzie nieabchodnaści.
Raju ŭziać dla siaredzinki pavieka sakavity, bliskučy koler, bo mienavita jon budzie pryciahvać uvahu, znachodziačysia na samaj vypukłaj častcy i adbivajučy bolš za ŭsio śviatła. Ja abrała załaty, jaki pasuje maim zialonym vačam — dla šerych abo błakitnych udałymi buduć aranžavy, miedny, ružovy, dla karych — zialony abo sini. Ale naohuł heta ŭsio, viadoma, praviły, prydumanyja dla taho, kab ich parušać — u 2019 hodzie, na ščaście, havorka pra koleratypy zachodzić usio radziej.
Ciapier, kali my nanieśli ŭsie zapłanavanyja adcieńni cieniaŭ na pavieka, nastaŭ čas uvažliva ahledzieć vynik i pravieryć na najaŭnaść niedachopaŭ. Dzieści koler moh lehčy nie tak jarka, jak chaciełasia b — dadajom druhi płast, možna palcam abo vilhotnym pendźlem dla bolšaj nasyčanaści (spyrsnuć jaho možna navat vadoj, ale fiksatar makijažu ci navat tonik dla tvaru padyduć lepš). Vatnyja pałački — adzin z maich samych lubimych i patrebnych instrumientaŭ u kaśmietyčcy, zavostranyja — naohuł padarunak losu! Tym nie mienš davajcie imknucca nie zachaplacca praźmierna ich vykarystańniem, bo navakolnamu asiarodździu jany nanosiać značny ŭron. Dla hetaha makijažu nam chopić adnoj — zavostranym končykam aściarožna pravodzim tonki chvościk strełki, zvyčajnym — projdziemsia pa jaje krai, kab ścierci ŭsio lišniaje, padpraviŭšy formu.
Amal skončyli! Ciapier končykam pendźla abo toj ža vatnaj pałačkaj akuratna rastušoŭvajem miežy koleraŭ na pavieku, atrymlivajem płaŭny hradyjent. Pry žadańni dadajom pad bryvo i na skułu chajłajtar (abo śvietłyja cieni).
Apošni krok — prafarboŭvajem viejki spačatku na nižnim pavieku, potym na vierchnim (tak zručniej, kab ničoha nidzie nie adbiłasia). Možna taksama pryčasać ich, pakul jany jašče nie padsochli, čystaj ščotačkaj, raździalajučy viejki i zdymajučy liški praduktu. Biełaruskija tušy, darečy, u asabistym topie navat ŭ znakamitych vizažystaŭ ź inšych krain, i heta całkam zasłužana, bo ŭ ich vydatnaja jakaść pa canie kubka kavy. Ja lublu «5 zorak» ad BelorDesign, Luxury ad Belita taksama kłasnaja (tolki ŭ załatym ciubiku!), šmat chvalebnych vodhukaŭ ab čyrvonaj XXXL ad Relouis.
Voś i ŭsio! Nasibielny i nianudny makijaž vačej hatovy, zastałosia tolki dadać troški rumian, pamadu abo balzam dla vusnaŭ — a paśla pary sprob času adymać heta budzie zusim niašmat, i vy zmožacie varjiravać jarkaść i šyryniu strełki ŭ zaležnaści ad nahody i nastroju.
Jak vam ideja, «nadzieli» by takija strełki na špacyr viasnovym dniom?
Varyjant mejku №2
Jak i ŭ pieršym vypadku, rychtujemsia da naniasieńnia dekaratyŭnaj kaśmietyki pry dapamozie kaśmietyki dla dohladu, pry nieabchodnaści vykarystoŭvajem tanalny srodak i kansiler, robim układku brovaŭ.
Nanosim bazu pad cieni, padušačkaj palca raźmiarkoŭvajem pa pavierchni pavieka.
Biarom upadabanyja cieni i pendźlem pačynajem akuratna ruchami, byccam pryklejvajem, budavać formu budučaj strełki. Dla hetaha makijažu kłasna padyduć cieni-mietalik, abo, jak ich časta nazyvajuć, z efiektam folhi (foiled u aryhinale). Niadaŭna svajoj sieryjaj Melted Chrome usim u samaje serca trapiŭ niamiecki moładzievy brend Essence — pryhledźciesia da hetych adnušak, u ich fajnaja tekstura śmietankovaha masła, piaščotnaja i tryvałaja adnačasova.
Malujem strełcy chvościk — na temu taho, jak heta pravilna rabić, u internecie jość sotni tysiač navučalnych urokaŭ i videa. Ničoha składanaha tut niama! Koratka kažučy, strełka pavinna praciahvać uzychodziačuju liniju nižniaha pavieka, jak by vyciahvajučy voka ŭvierch. Tamu malavać jaje varta tolki z adkrytymi vačyma, dla zručnaści možna prypadniać brovy, kab skura pavieka źlohku naciahnułasia.
Adna strełka hatovaja, dadajom druhuju. Dla hetaha biarom vadkuju padvodku (ja ŭžo nieadnarazova pryznavałasia ŭ lubovi da čornaj Deer Eyes ad Relouis), zdymajem z pendźla liški praduktu ab kraj słoička i samym končykam aściarožna pačynajem malavać tonkuju liniju. Kali ŭsio zrabić pravilna, jana sama budzie pieraryvacca, bo ŭ nas na pavieku ŭžo jość płast cieniaŭ.
Naša irvanaja strełka hatovaja, čas pravieryć, ci nie absypalisia cieni na ščoki, pry nieabchodnaści padčyścić ich, padpravić linii i dadać chajłajtar na skułu i pad bryvo.
Staranna prafarboŭvajem viejki, pačynajučy ad karanioŭ — zručna pry hetym hladzieć u lusterka źvierchu ŭniz, tak vy zmožacie lepš kantralavać ruchi ščotački i nie trapicie joju ŭ voka, abo, što jašče horš, u našu cudoŭnuju strełku.
Et voilà! Prosty, piaščotny i chutki makijaž vačej z nalotam mastackaści hatovy. Pryjemny bonus — jon pratrymajecca ŭvieś dzień i źbiare šmat kamplimientaŭ.
Dla bolšaj pierakanaŭčaści my rekamiendujem dadać da jaho trochi rumian na ščoki, ledź-ledź prazrystaha blasku na vusny i jak maha bolš viasnovaha nastroju!
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj14
Kamientary