Stamatołah z Oršy raspaviała, što śpiecsłužby prapanavali joj viarnucca z ZŠA ŭ Biełaruś. Jana adkazała
U Biełarusi joj abiacali «hodnaje žyćcio».
Stamatołah z Oršy Natalla Kukišava, jakaja źjechała ŭ ZŠA paśla źniavoleńnia ŭ Biełarusi, zapisała rolik, u jakim raspaviała, što joj napisali i prapanavali viarnucca dadomu i «žyć hodnym žyćciom».
«Ale ja ž viedaju, jak u ich vyhladaje hodnaść i čym jana pachnie», — kaža Natalla. I raskazvaje pra heta hodnaje žyćcio svaju historyju.
«Kali nas zatrymali, to pieršyja dva miesiacy z nas ździekavalisia jak mahli, prydumlali ŭsialakija zabavy. I voś u adzin ź dzion nam skazali, što ŭ nas nie budzie vady. Rastłumačyli tym, što ŭ Žodzinie pravodziacca niejkija tam ramontnyja pracy, i ŭ turmie vady nie budzie», — raskazvaje jana.
Nabrać vady nie było kudy, i niedzie z pałovy na siomuju ranicy da vaśmi viečara ŭ kamiery nie było vady.
«Kamiera — 14 žančyn, kamiera maleńkaja, prybiralnia — heta dzirka ŭ padłozie. Nu i ŭ prybiralniu ža ŭsio roŭna ŭsie chodziać, heta ž naturalnaja patreba, i ad hetaha niemahčyma nikudy padziecca. Voś ujavicie hramadskuju prybiralniu na jakim-niebudź mierapryjemstvie, i voś ceły dzień tudy chodziać ludzi, i vy tudy ŭviečary vyrašyli zajści. Nu dyk voś pachi, napeŭna, byli jašče kruciejšyja, bo tam tualet pravietryvaŭsia, a ŭ nas kamiera była całkam zakrytaja i nie było vientylacyi. Mnie zdajecca, pad viečar u nas užo vočy pačynała rezać», — raskazvaje jana.
I voś u adzin ź dzion u turmie ŭ Žodzinie była vialikaja pravierka.
«Ujavicie, jak heta vyhladała z kamiery: nam skazali pašychtavacca — my pašychtavalisia. Adčyniajucca dźviery. Da nas u kamieru ŭvachodzić mužyk — važny taki, pahony, ordeny, hrudzi napierad. I jon robić krok u kamieru… I, karaciej, dalej jak u kino. Jon vyskačyŭ, ja nie viedaju jak, nibyta jamu dvaccać hadoŭ, i jon spartsmien tam niejkaha suśvietnaha ŭzroŭniu pa skačkach. Tamu što adna sprava — raskazvać ludziam pra paradak i pra toje, nakolki jany nikčemnyja, a inšaja sprava — udychnuć pach ułasnaha maralnaha vybaru», — kaža jana.
I praź piać chvilin vadu ŭžo dali. To-bok vada tam była.
«I voś mnie zaraz kažuć, «pryjazdžaj, budzieš žyć hodna». Dyk voś mnie chaciełasia b spytać voś hetaha načalnika, jaki da nas u toj dzień zajšoŭ: «A vy kali dźviery kamiery adčynili, vy što adčuli? Pach ułasnaj hodnaści ci pach majho prynižeńnia?» — źviarnułasia ŭžo z ZŠA Natalla da taho načalnika.
Natallu Kukišavu zatrymali supracoŭniki KDB vosieńniu 2021 hoda pa «spravie Zielcera». Ale asudzili na dva hady kałonii za kamientary pra Łukašenku.
Kamientary