U Litvy budzie novy prezident. Siońnia tam vybary, i jość intryha, vartaja dobraha detektyva

Siońnia ŭ Litvie prachodzić pieršy tur prezidenckich vybaraŭ. Kraina z 1993 hoda abiraje ŭžo piataha prezidenta, a vybary siomyja. Dala Hrybaŭskajcie adbyła dva terminy i, pavodle Kanstytucyi, nie moža bałatavacca.

Na finišnuju pramuju vyjšli dzieviać kandydataŭ: 

ad partyi «Sialan i zialonych» — premjer-ministr Saŭlus Skviarnialis, ad kansiervataraŭ — Inhryda Šymanicie, ad sacyjał-demakrataŭ — jeŭrakamisar Vicianis-Poviłas Andrukajcis, lidar Vybarčaj akcyi palakaŭ Litvy-Sajuz chryścijanskich siemjaŭ (IAPŁ-SCHS) Valdemar Tamašeŭski, fiłosaf Arvidas Juazajcis, člen Jeŭraparłamienta Valancinas Mazuronis, ekanamist Hitanas Naŭsieda, parłamientaryi Mindaŭhas Pujdokas i Nahlis Puciejkis.

Taksama siońnia prachodziać refierendumy pa skaračeńni kolkaści členaŭ Siejma, i ab dvajnym hramadzianstvie

Tamašeŭski, naprykład, vykazvajecca za abaronu ruskamoŭnaha i polskamoŭnaha nasielnictva. Ale jahony rejtynh roŭny 1,5%.

Arvidas Juazajcis maje cikavuju bijahrafiju, jon — płyviec, bronzavy pryzior Alimpijady-1976, potym pastupiŭ na fiłasofski fakultet, staŭ doktaram fiłasofii, byŭ staršym navukovym supracoŭnikam AN Litvy. Juazajcis — adzin z zasnavalnikaŭ «Sajudzisa».

Ale hałoŭnaja baraćba razhorniecca pamiž tryma kandydatami, jakija majuć prykładna adnolkavy rejtynh.

Heta kansiervatar, kandydat ad Sajuza Ajčyny — Chryścijanskich demakrataŭ Inhryda Šymanicie.

Pavialičyć

Šymanicie — 45 hadoŭ, u 2009—2013 hh. jana była ministram finansaŭ, zatym namieśnikam staršyni Banka Litvy. Inhryda vyjhrała prajmieryz u dypłamata Vihaŭdasa Ušackasa z vynikam 78%.

Jejnyja hałoŭnyja supierniki — ekanamist Hitanas Naŭsieda i premjer Saŭlus Skviarnialis.

Pavialičyć

Naŭsiedu — 55 hadoŭ, jon viadomy bankir i ekanamičny daradca. Byŭ daradcam prezidenta Vałdasa Adamkusa. Časta vystupaje ŭ ŚMI z tłumačeńniem ekanamičnych prablem Litvy.

Pavialičyć

Saŭlusu Skviarnialisu — 48. Z adukacyi jon inžynier-matematyk, ale vyrašyŭ zrabić palicejskuju karjeru. Prajšoŭ usie prystupki: ad darožnaha inśpiektara ŭ Trakai da hienieralnaha kamisara palicyi i ministra ŭnutranych spraŭ. Jaho partyja «Sajuz zialonych i sialan» u 2016 h. vyjhrała vybary, i Skviarnialis uznačaliŭ urad.

Rejtynh u troch kandydataŭ prykładna adnolkavy:

trojka lidaraŭ u kancy krasavika vyhladała tak: Inhryda Šymanicie — 26,2% (u sakaviku 24,8%), Naŭsieda - 24,6% (27,9%), Saŭlus Skviarnialis - 16,6% (14,5%). U pačatku maja Skviarnialis skaraciŭ adstavańnie.

Druhi tur projdzie 26 maja.

Usie kandydaty ŭ Litvie ćviordyja niezaležniki, rynačniki i prychilniki ES, tamu nijakich źmienaŭ kursu paśla vybaraŭ nie budzie. Adnak prezident Litvy vałodaje značnymi paŭnamoctvami.

I mienavita jamu (ci joj) udzielničać u mierapryjemstvach pa pierapachavańni pareštkaŭ Kalinoŭskaha.

• 0
• 0
• 0
• 0
• 0
• 0
• 0
• 0