Što zastajecca niezrazumiełym u historyi z suicydam mahiloŭskaha daišnika
22-hadovy inśpiektar DAI Jaŭhien Patapovič źnik 16 maja. U toj ža viečar jaho znajšli miortvym u lesie. Ruki inśpiektara byli ŭ kajdankach, jon zahinuŭ ad streła ŭ hałavu.
Niezadoŭha da śmierci Patapovič adpraviŭ kaleham paviedamleńnie, što jon u čornaj «Vołzie» z rasijskimi numarami, u mašynie troje cyhanoŭ.
Mašynu šukali pa ŭsioj krainie. Ale praź niekalki dzion śledčyja pryjšli da vysnovy, što lejtenant Patapovič ździejśniŭ suicyd.
Čytajcie
Asnoŭnaja viersija SK: 22-hadovy daišnik Jaŭhien Patapovič ździejśniŭ suicyd
Ale ŭ hetaj historyi zastajucca niezrazumiełyja momanty.
Atrymlivajecca, što Patapovič płanavaŭ suicyd zahadzia. Paviedamleńnie pra «Vołhu» i cyhanoŭ adpraviŭ, kab źbić z pantałyku kalehaŭ.
Kala 11 hadzin ranicy ŭ dzień śmierci Patapovič nabyŭ u adnoj z mahiloŭskich kram rydloŭku, drovy i vadkaść dla raspalvańnia. Hetyja rečy znajšli na miescy jaho śmierci, to bok jon pryvioz ich tudy zahadzia.
Ale navošta? Chacieŭ spalić siabie, a paśla pieradumaŭ?
Ale navošta tady drovy?
A navošta rydloŭka?
Ci spačatku Patapovič płanavaŭ zabojstva kahości, padrychtavaŭšy drovy i rydloŭku dla taho, kab pazbavicca ad cieła?
Ale SK kateharyčna abviarhaje, što Patapovič moh płanavać zabić kahości.
Drovy, vadkaść i rydloŭka byli dla taho, kab źniščyć svaje rečy, častku ich jon navat paśpieŭ źniščyć, paviedamiła aficyjny pradstaŭnik SK Julija Hančarova. Źniščyć častku rečaŭ inśpiektar chacieŭ, kab śmierć była bolš padobnaj na zabojstva.
Naprykład, štanoŭ na im nie było, bo pierad śmierciu Patapovič ich spaliŭ.
Inśpiektar zakavaŭ svaje ruki ŭ kajdanki. Atrymlivajecca, jon inscenavaŭ svajo zabojstva. Ale čamu tady jon nie pazbaviŭsia ad telefona, jaki znajšli pobač ź im i ź jakoha jon adpraŭlaŭ paviedamleńnie kaleham?
Śledčy kamitet paviedamiŭ, što raniej Patapovič padrychtavaŭ šerah paviedamleńniaŭ ab suicydalnych namierach, kab razasłać ich kaleham i svajakam, kali ŭ krasaviku ŭžo sprabavaŭ ździejśnić suicyd.
Ale chto vyratavaŭ jaho? Kali heta byli svajaki ci siabry, dyk čamu nie paviedamili milicejskamu načalstvu, što čałaviek, jaki štodzionna nosić z saboj zbroju, maje prablemy ź psichikaj?
Jak ža pracujuć milicejskija psichołahi, jakija prahladzieli hetyja prablemy?
Śledčy kamitet adkazaŭ koratka, što ludzi, jakija vyratavali inśpiektara, dapytanyja ŭ ramkach kryminalnaj spravy.
Ale ž navošta lejtenantu patrebna było tak staranna imitavać svajo zabojstva?
Pra kanflikty z kalehami pakul ničoha nie paviedamlajecca. Ale — heta tolki ničym nie paćvierdžanaja viersija — Patapovič moh mierkavać, što kali jaho śmierć pryznajuć zabojstvam supracoŭnika MUS pry vykanańni słužbovych abaviazkaŭ, to paśla siamja budzie atrymlivać vypłaty ad dziaržavy.
Ciapier rasśledavańnie praciahvajecca, śledčyja šukajuć čałavieka, jaki padvioz Patapoviča da lesu, dzie toj pakončyŭ z saboj.
Čytajcie
SK: daišnik sam spaliŭ štany pierad śmierciu
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary